Zum Seiteninhalt

Novas cundiziuns generalas per ils servetschs psichiatrics dal Grischun

  • Erste Mitteilung
  • Neuen Beitrag einfügen

Ils servetschs psichiatrics dal Grischun duain pudair agir anc pli fitg sco interpresa: La regenza ha deliberà la missiva per ina revisiun correspundenta da la lescha davart l'organisaziun da la psichiatria.

Ils servetschs psichiatrics dal Grischun (SPGR) duain survegnir la libertad necessaria d'agir sco interpresa per pudair realisar cun success il nov sistem da finanziaziun ch'è en vigur dapi il 1. da schaner 2012. Tenor quest sistem vegnan ils ospitals e las instituziuns per persunas cun impediments finanziads tenor lur prestaziuns. La midada premetta che las cundiziuns generalas giuridicas per ils SPGR vegnian adattadas. Per quest intent ha la regenza deliberà la missiva per ina la revisiun da la lescha davart l'organisaziun dals servetschs psichiatrics chantunals e da las chasas chantunalas da dimora per persunas cun impediments psichics dal chantun Grischun (lescha davart l'organisaziun da la psichiatria).

Ils puncts ils pli impurtants da la revisiun da la lescha prevesan:

  • da transferir als SPGR – en il dretg da construcziun – ils edifizis ed ils stabiliments ch'èn necessaris per il manaschi, cun excepziun dal bain puril Waldhaus 
  • da dar als SPGR in chapital da dotaziun da maximalmain 10 milliuns francs 
  • da conceder als SPGR la pussaivladad da far reservas

Cun transferir als SPGR – en il dretg da construcziun – ils bains immobigliars ch'èn necessaris per il manaschi pon ils SPGR – ord vista da la regenza – agir meglier en conturns da martgà che daventan adina pli dinamics. Perquai ch'il princip da la cuvrida dals custs è vegnì remplazzà per il 1. da schaner 2012 tras il sistem ch'ils ospitals e las instituziuns per persunas cun impediments vegnan finanziads tenor lur prestaziuns, ston ils SPGR ultra da quai avair avunda agen chapital per pudair ademplir da tut temp lur obligaziuns. Il chantun è interessà che la structura da la bilantscha dals SPGR na vegnia betg influenzada en moda negativa tras ina quota da chapital ester memia gronda. Ils SPGR ston perquai survegnir in chapital da dotaziun che correspunda a las ristgas.

L'onn 2002 èn las clinicas psichiatricas chantunalas e las chasas chantunalas da dimora e da lavur per persunas cun impediments psichics vegnidas excorporadas da l'administraziun chantunala e transferidas en in institut autonom da dretg public. Questa independenza è vegnida realisada cun la finamira da dar als SPGR la libertad necessaria per pudair far frunt a las pretensiuns che vegnan fatgas pli e pli fitg envers ils ospitals ed envers las clinicas, numnadamain da furnir lur prestaziuns en moda economica. Quella giada èsi vegnì desistì da dar a l'institut in agen chapital e d'al conceder la pussaivladad da far reservas. Dapi lura vegnan ils edifizis ed ils stabiliments dads en locaziun als SPGR.

Il cussegl grond vegn a tractar questa fatschenta en la sessiun d'october 2012.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun

Neuer Artikel