Tgi che va cun velo e tgi che va a pe en il Grischun po profitar d'in transfer da la bagascha senza accumpagnament: surdada la damaun a la recepziun da l'hotel vegn la bagascha transportada il medem di a 43 destinaziuns ed a 31 hotels da partenadi en il chantun.

Adina dapli giasts cun velos da muntogna passentan lur vacanzas en il Grischun. Savens èn els en gir en moda surregiunala ed en gruppas pitschnas. Sin lur turas da plirs dis sur munts e vals s'exponan els a divers strapatschs e surmuntan differents obstachels. Al confort da vestgadira frestga e dal laptop sco part impurtanta da lur vita na vulan els però tuttina betg renunziar per in'aventura absoluta sin il velo da muntogna. Quai als vegn pussibilità grazia al servetsch "Bagascha da viadi svelta Grischun". Il transfer da bagascha senza accumpagnament n'è nagliur uschè nuncumplitgà sco en il Grischun. Grazia a quest servetsch èsi pussaivel da transportar la bagascha il medem di a 43 destinaziuns ed a 31 hotels da partenadi en il chantun Grischun. In term impurtant per il transfer da bagascha per ils giasts che fan viadis da plirs dis cun velo u a pe.

In transport quotidian da bagascha dad A a B para – sin l'emprima egliada – dad esser insatge trivial. En vardad è quai però ina sfida logistica fitg cumplexa che ha pudì vegnir dumagnada mo grazia al servetsch excellent da la Viafier retica e da l'AutoDaPosta Grischun. Per il giast èsi da princip pussaivel da profitar dal servetsch "Bagascha da viadi svelta Grischun" senza ina preannunzia. La suletta cundiziun: La bagascha sto vegnir depositada tar la recepziun da l'hotel avant las 9 la damaun. Uschia vegn regalà al giast in nov gener da flexibilitad che n'è betg stada pussaivla enfin ussa. Da questa flexibilitad pon er profitar organisaturs da viadis en il sectur dal viandar e da l'ir cun velo per offrir unitads e turas attractivas.

Adina dapli bagascha viagia suletta
A partir da questa stad stat il servetsch "Bagascha da viadi svelta Grischun" primarmain a disposiziun a tut ils partenaris da grischunBIKE. Cun Bike-Explorer ha pudì vegnir gudagnà in organisatur da viadis etablì en il sectur dals velos da muntogna. Da nov porscha er il parc natiral Ela, il parc natiral il pli grond da la Svizra, in'unitad da viandar cun il servetsch "Bagascha da viadi svelta Grischun". Tge che l'avegnir porta, vegn a sa mussar. Per l'onn 2013 èn previsas pitschnas meglieraziuns sco er la vasta commerzialisaziun da questa purschida. Hotels, organisaturs da viadis u organisaziuns turisticas interessadas pon gia oz s'annunziar tar la Fabrica da temp liber (www.freizeitfabrik.ch).

Il servetsch "Bagascha da viadi svelta Grischun" è in project parzial da grischunBIKE ch'è vegnì elavurà en collavuraziun cun l'AutoDaPosta Grischun e cun la VR. GrischunBIKE è in project da blers onns dal post spezialisà per il traffic betg motorisà e da l'uffizi per economia e turissem. Cun analisas, cun instrucziuns, cun recumandaziuns e cun lavuratoris duai vegnir stgaffida la basa per ina valurisaziun gronda e persistenta en las destinaziuns turisticas sco er tar ils differents partenaris da servetsch. En quest connex na vegnan er betg negligids ils aspects ecologics ed ils giavischs da las ulteriuras gruppas da persunas che dovran las medemas vias.


Infurmaziuns:
Peter Stirnimann, uffizi da construcziun bassa dal Grischun, responsabel per las medias, tel. 081 257 37 11 u tel. 079 291 72 75
 

Gremi: uffizi da construcziun bassa dal Grischun
Funtauna: rg uffizi da construcziun bassa dal Grischun