Sin invitaziun da la regenza grischuna visita la regenza dal chantun Soloturn oz e damaun il Grischun. Sin il program è stada quest suentermezdi ina visita dal chastè da Tarasp. Damaun maina ina spassegiada en la Val S-charl.
A chaschun da sia visita dal chantun Grischun vegn la delegaziun da Soloturn manada dal president da la regenza Peter Gomm. El vegn accumpagnà da la vicepresidenta da la regenza Esther Gassler sco er dals cussegliers guvernativs Klaus Fischer, Walter Straumann e Christian Wanner. La regenza grischuna sa participescha cumplettamain a la scuntrada.
Retschavids èn ils giasts vegnids quest suentermezdi da la presidenta da la regenza Barbara Janom Steiner a la staziun da Landquart. Suenter in curt detur en il center da furmaziun e cussegliaziun agricula Plantahof è la delegaziun viagiada en l'Engiadina bassa, nua ch'ella ha visità il chastè da Tarasp. La gievgia avantmezdi ha lieu ina spassegiada en la Val S-charl.
La visita da la regenza dal chantun Soloturn serva en emprima lingia a tgirar las relaziuns amicablas ed a barattar experientschas sin ils champs da la cultura, da l'economia e da la politica.
Fotografia agiuntada:
Las regenzas dal Grischun e dal Soloturn sin il chastè da Tarasp: Mario Cavigelli, Martin Jäger, Hansjörg Trachsel, Claudio Riesen (chancelier), Christian Rathgeb, Barbara Janom Steiner (presidenta da la regenza), Peter Gomm (president da la regenza), Christian Wanner, Esther Gassler, Klaus Fischer, Walter Straumann und Andreas Eng (Staatsschreiber) (da sanestra).
Gremi: chanzlia chantunala dal Grischun
Funtauna: rg chanzlia chantunala dal Grischun