Cuntegn da la pagina

Cun POLYCOM cumenza ina nova epoca da func

  • Erste Mitteilung
  • Neuen Beitrag einfügen
Glindesdi, ils 3 da settember 2012, ha il chantun Grischun mess en funcziun la nova rait da func da segirezza POLYCOM Grischun. Uschia finescha ina fasa da planisaziun e d'installaziun che ha durà 10 onns. Uss, che POLYCOM è vegnì mess en funcziun en il Grischun, cumenza per il chantun ina nova epoca da communicaziun.

La nova rait da func da segirezza POLYCOM è vegnida preschentada il glindesdi a chaschun d'ina orientaziun da las medias. Suenter ha il cusseglier guvernativ Christian Rathgeb, schef dal departament da giustia, segirezza e sanadad, surdà POLYCOM al cumandant da la polizia chantunala dal Grischun, Walter Schlegel, per il manaschi operativ. La polizia chantunala dovra sco emprima organisaziun chantunala il nov sistem da func. Ils ulteriurs partenaris vegnan a surpigliar quest sistem pass per pass ils proxims mais.

In grond pass per la populaziun grischuna
Il cusseglier guvernativ Rathgeb ha cumpareglià l'avertura da POLYCOM en il Grischun cun l'emprima tschentada sin la glina. Sco per Neil Armstrong saja quai in pitschen pass er per el, ma in grond sigl per la populaziun dal chantun Grischun. "Per l'emprima giada pon tut ils partenaris da la protecziun da la populaziun communitgar in cun l'auter independentamain da l'organisaziun", ha ditg Rathgeb il glindesdi davant las medias. Fin ussa utilisava l'administraziun chantunala tschintg differentas raits da func. Ils servetschs da salvament, il corp da guardias da cunfin (Cgcf) ed autras organisaziuns activas en il chantun avevan agens sistems da func. Cun POLYCOM communitgeschan ussa tut las organisaziuns cun il medem sistem, ed en cas d'in eveniment grond pon ils partenaris ch'èn en acziun entrar en contact da tut temp cun ils ulteriurs partenaris ed èn correspundentamain infurmads davart l'eveniment.

La basa è in'atgna rait da func
POLYCOM cuvra 92 pertschient da la surfatscha chantunala cun ina rait da func, e quai independentamain da la rait da telefonia mobila publica. Per garantir questa gronda cuvrida èn vegnidas realisadas 90 staziuns da basa. Er en 29 tunnels per lung da las vias chantunalas e naziunalas è vegnida garantida la cuntanschibladad per func. Tras questa rait da func han pudì vegnir remplazzadas pliras raits communalas, chantunalas e federalas. Quai optimescha il manaschi e reducescha correspundentamain ils custs per mantegnair il sistem. Manà vegn POLYCOM dal center da cumpetenza "func" da la polizia chantunala dal Grischun. La communicaziun da func en questa rait da segirezza è codada tras plirs stgalims. I n'è pia betg pussaivel da tadlar in discurs sin la via da transmissiun. Il concept da func, ch'è vegnì elavurà ensemen cun tut las organisaziuns participadas, permetta dentant da communitgar in cun l'auter – en cas d'in eveniment – confurm als basegns.

Il corp da guardias da cunfin sco partenari impurtant
Sia cuntentientscha ha er Walter Schlegel exprimì il glindesdi. "Sco cumandant da la polizia chantunala dal Grischun èsi per mai ina gronda onur ed in grond plaschair da dastgar metter en funcziun oz POLYCOM sco emprima organisaziun chantunala", ha el ditg. El ha er accentuà l'impurtanza da la communicaziun da func per dumagnar eveniments. "Quai permetta ina collavuraziun effizienta e generescha in vair niz supplementar." Er occurrenzas grondas sco il campiunadi mundial da skis u il forum economic mundial annual a Tavau pon vegnir preparadas e realisadas en l'avegnir en moda bler pli simpla ed effizienta. Il Cgcf – ch'è il pli grond gestiunari da l'infrastructura da POLYCOM en Svizra – ha pudì vegnir acquistà dal chantun sco partenari per installar e per manar POLYCOM en il Grischun. Parts essenzialas da la rait da func da segirezza POLYCOM Grischun èn vegnidas installadas e finanziadas dal Cgcf. Il Cgcf sa participescha er vinavant a la finanziaziun dals custs da manaschi dal center da cumpetenza POLYCOM Grischun ch'è domicilià tar la polizia chantunala. Il center da cumpetenza ha l'incumbensa da garantir il manaschi e da mantegnair la rait da func. Tras la collavuraziun cun il Cgcf ha il chantun pudì spargnar fin ussa e po el spargnar er en l'avegnir blers custs d'investiziun e da manaschi.

145 francs per abitanta u abitant
Il culp da partenza per il project POLYCOM en il Grischun è vegnì dà il schaner 2004, cur che la regenza grischuna ha fixà en in da ses conclus las responsabladads, l'organisaziun dal project ed ils termins approximativs. Ils 23 d'avrigl 2009 ha il cussegl grond approvà cun 93 cunter 0 vuschs in credit d'impegn da 55 milliuns francs per POLYCOM. Quai è stà il crap da fundament per realisar la rait da func da segirezza en il Grischun. A chaschun da l'orientaziun da las medias dal glindesdi ha il cusseglier guvernativ Rathgeb pudì constatar cun satisfacziun che las expensas nettas concedidas da 27,5 milliuns francs na vegnan betg surpassadas, malgrà ch'il project ha durà 10 onns. "Per mintga singula abitanta e per mintga singul abitant resultan pia custs da 145 francs. En vista al niz ch'è collià cun la rait da func da segirezza POLYCOM è quest import modest investì bain", ha ditg Rathgeb, ed el ha engrazià a tut las organisaziuns ed interpresas ch'èn stadas ed èn anc participadas a l'elavuraziun da las basas da decisiun ed a la realisaziun da la rait da func da segirezza POLYCOM Grischun.


Tge è POLYCOM?
POLYCOM è il sistem da func naziunal da las autoritads e da las organisaziuns da salvament e da segirezza (AOSS) che vegn stabilì pass per pass en Svizra. El permetta il contact da func entaifer e tranter las differentas organisaziuns, vul dir la polizia, ils pumpiers, il servetsch da salvament sanitar, ils manaschis tecnics da las vischnancas, la protecziun civila, las guardias da cunfin e las furmaziuns da sustegn da l'armada. Il project ha la finamira che tut ils partenaris da la confederaziun, dals chantuns e da las vischnancas possian transmetter discurs da func sur ina infrastructura unitara ed omogena. Ils chantuns installeschan en moda autonoma las raits parzialas tenor lur basegns, resguardond las prescripziuns da l'uffizi federal da protecziun da la populaziun. La confederaziun sa participescha considerablamain a las investiziuns ed al mantegniment.
Ulteriuras infurmaziuns sut www.polycom.admin.ch e www.polycom.gr.ch.  


Infurmaziun:
Davart quest tema stat a disposiziun in video sut www.gr.ch.


Infurmaziuns:
cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01


Gremi: departament da giustia, segirezza e sanadad
Funtauna: rg departament da giustia, segirezza e sanadad
Neuer Artikel