Cuntegn da la pagina

Il chantun Grischun infurmescha da nov er cun videos

  • Erste Mitteilung
  • Neuen Beitrag einfügen
Il chantun Grischun prenda ina nova via per la communicaziun. En il futur infurmescha el er cun contribuziuns da video. Las burgaisas ed ils burgais duain pudair sa far in maletg anc meglier davart chaussas actualas ed interessantas sut www.gr.ch.

Sin la pagina d'internet dal chantun Grischun vegnan en il futur publitgads sut www.gr.ch videos davart conclus actuals da la regenza ed infurmaziuns interessantas da l'administraziun chantunala. La regenza grischuna ha deliberà ina nova strategia da communicaziun che cumpiglia la producziun da videos. La finamira è quella che las burgaisas ed ils burgais pon s'infurmar en ina moda e maniera moderna en curt temp davart singulas fatschentas da la regenza e davart eveniments che pertutgan il chantun. Ils videos vegnan publitgads ensemen cun las communicaziuns en scrit e cumpletteschan la vasta purschida d'infurmaziun electronica sin www.gr.ch. Responsabla per la realisaziun è la chanzlia chantunala dal Grischun che producescha da nov sezza contribuziuns da film, e quai cun ina infrastructura engrondida e cun ulteriur persunal.

Infurmaziuns dal di actualas per l'egl e per l'ureglia
Lantschada vegn la communicaziun multimediala cun infurmaziuns actualas davart la rait da func da segirezza POLYCOM Grischun. En ina curta intervista da video respunda cusseglier guvernativ Christian Rathgeb, schef dal departament da giustia, segirezza e sanadad, trais dumondas davart la nova rait da func da segirezza. Quest video cumplettescha las explicaziuns en scrit che stattan er a disposiziun sut www.gr.ch. Ultra da quai stat il material da basa tar il video a disposiziun a las schurnalistas ed als schurnalists en l'original sco maletg e sco tun per duvrar libramain.

Ultra da talas curtas posiziuns sin video da la commembra e dals commembers da la regenza sco er da manadras e da manaders da posts chantunals da servetsch vegnan producidas en il futur regularmain contribuziuns da film arranschadas sco er documentaziuns e reportaschas. Per quai duain vegnir tschernids en emprima lingia temas che fatschentan las burgaisas ed ils burgais. Tut las contribuziuns vegnan publitgadas en l'internet e pon vegnir clamadas si da tut temp sut www.gr.ch. Ils umans en il Grischun survegnan uschia en il futur anc dapli infurmaziuns da l'emprim maun.


Infurmaziuns:
chancelier Claudio Riesen, chanzlia chantunala dal Grischun, tel. 081 257 22 21


Gremi: chanzlia chantunala dal Grischun
Funtauna: rg chanzlia chantunala dal Grischun
Neuer Artikel