Nov interpresas pitschnas e mesaunas (IPM) dal Grischun lavuran vi da structuras favuraivlas per famiglias en lur manaschis. Dacurt ha gì lieu in emprim barat en il rom dal project "IPM grischunas en acziun: structuras favuraivlas per famiglias sco factur da success" dal post da stab per l'egualitad da las schanzas.

Mintga IPM è differenta. Perquai dovra ella mesiras individualas e fatgas "sin mesira", sch'ella s'occupa da la dumonda, co ch'ella duai survegnir structuras pli favuraivlas per famiglias. Durant l'ultim mez onn han nov IPM da la Val dal Rain grischuna laschà analisar cun success lur cundiziuns da lavur. Quai cun il sustegn professiunal dal post spezialisà "UND". Plinavant han las IPM elavurà emprims plans da mesiras.

A l'emprima maisa radunda da gievgia, ils 6 da settember 2012, nua che represchentantas e represchentants da tut las nov IPM èn sa radunadas ad in barat, èn vegnidas discutadas las emprimas mesiras da success. Sco sfidas han las represchentantas ed ils represchentants da las IPM numnà la problematica d'acquistar cun success forzas spezialisadas sco er da communitgar e da render fritgaivlas vers anora e vers anen las structuras favuraivlas per famiglias da l'interpresa. Propostas da soluziun en chaussa èn vegnidas elavuradas en gruppas. Fin a la proxima maisa radunda che ha lieu la primavaira 2013 vegnan las nov IPM a realisar lur plans da mesiras ed a rimnar experientschas.

Interpresas da tut ils secturs
Las IPM grischunas che s'engaschan en il project dal post da stab per l'egualitad da las schanzas represchentan quasi l'entir spectrum da branschas dal chantun. Represchentads èn ils secturs da l'economia d'energia (IBC energia aua Cuira), da la gastronomia (Merz Gastro SA), dal commerzi (Josias Gasser Materialias da construcziun SA), da la vendita (Do it, Baumarkt SA), da la tgira (spitex Cuira), dal traffic public (Bus da la citad da Cuira SA), da la lingua e cultura (Lia rumantscha), da l'hotellaria (hotel Stern) e dal svilup da programs da computer (Wenzel Metromec SA). Tut en tut profiteschan en l'avegnir circa 700 collavuraturas e collavuraturs en questas interpresas da pudair coordinar meglier la professiun cun la famiglia e cun la vita privata. In enritgiment per quest project è il fatg ch'igl èn participadas d'ina vart interpresas, nua che quasi mo umens u mo dunnas lavuran, ma da l'autra vart er interpresas cun teams maschadads.

En la proxima fasa dal project vegnan ils resultats analisads ed evaluads ensemen cun las interpresas. La finamira dal program è quella da laschar profitar las IPM localas da las experientschas d'autras firmas e d'autras regiuns e da crear ina conscienza per ils aspects economics positivs da cundiziuns da lavur favuraivlas per las famiglias. Il project vegn accumpagnà d'in cussegl consultativ cun represchentantas e represchentants da federaziuns economicas, dad IPM sco er da persunas da la politica e da l'economia. El vegn finanzià dal chantun Grischun, da la confederaziun e da sponsurs grischuns.

Dapli infurmaziuns sut www.stagl.gr.ch, www.und-online.ch e www.berufundfamilie.admin.ch  


Infurmaziuns:
Susanna Mazzetta, manadra dal project, post da stab per l'egualitad da las schanzas, telefon mobil 079 483 74 01, e-mail: Susanna.Mazzetta@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas