Navigation

Inhaltsbereich

  • Erste Mitteilung
  • Neuen Beitrag einfügen
Gievgia, ils 8 da november 2012, ha lieu en l'entira Svizra il Di naziunal da l'avegnir. Il post da stab chantunal per l'egualitad da las schanzas ha preparà duas purschidas novas per mattas e per mats. En il center stat l'emprim parlament grischun da mattas a Cuira.
 
L'emprim parlament grischun da mattas vegn avert il suentermezdi dals 8 da november en la sala dal cussegl grond a Cuira. Politicras e politichers cun experientscha sustegnan las mattas. La presidenta dal cussegl grond Elita Florin-Caluori maina la debatta. Sa participar pon 120 mattas da 13 fin 16 onns. Il parlament da mattas vegn concepì tenor l'exempel dal chantun Vad che realisescha quest parlament mintg'onn cun grond success. Ensemen cun l'annunzia èn las mattas envidadas da proponer temas per la debatta.
 
Per l'emprima giada porscha il center da furmaziun per la sanadad ed ils fatgs socials CSS a Cuira il suentermezdi dals 8 da november ina cursa da posts captivanta per mats dad 11 fin 13 onns. Là emprendan els ad enconuscher scolaziuns e professiuns dal sectur da sanadad e da tgira e pon discutar cun emprendists.

Per la segunda giada vegn organisà ils 8 da november a la scola auta da pedagogia a Cuira il di d'acziun "Aventura dar scola" per mats. L'avantmezdi survegnan ils mats ina invista da la scolaziun da las persunas d'instrucziun, il suentermezdi pon els sezs far l'experientscha da magister davant ina classa. A disposiziun stattan 12 plazzas. S'annunziar pon ins sut www.nationalerzukunftstag.ch. Là chattan ins er infurmaziuns davart ulteriuras purschidas en il Grischun, p.ex. davart informatica per mattas.

Dapli infurmaziuns sco er ils formulars d'annunzia per l'emprim parlament grischun da mattas e per la cursa da posts al CSS stattan a disposiziun sin la pagina d'internet www.stagl.gr.ch.

Cumbinaziun cun l'exposiziun professiunala FIUTSCHER
Dals 6 fin ils 11 da november 2012 ha lieu a Cuira l'exposiziun professiunala FIUTSCHER per tut tgi che ha interess. Il post da stab per l'egualitad da las schanzas è represchentà cun in agen stan. Dunnas giuvnas ed umens giuvens, ch'emprendan ina professiun atipica, sa preschentan là sco ambassaduras ed ambassadurs da lur professiun.

Ils 8 da november po ina visita da FIUTSCHER vegnir cumbinada cun il parlament da mattas u cun la cursa da posts al CSS. Classas che s'annunzian sur la pagina d'internet www.fiutscher.ch viageschan gratuitamain cun ils meds da transport publics a Cuira.
 

Infurmaziuns:
Claudia Meili-Senn, collavuratura scientifica dal post da stab per l'egualitad da las schanzas, tel. 081 257 35 70, e-mail: Claudia.Meili@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel