La regenza grischuna ha concedì differentas contribuziuns – tranter auter per la tgira da monuments – ed approvà projects da vias. 

Contribuziuns per mesiras da la tgira da monuments
La regenza ha concedì differentas contribuziuns a favur da mesiras per la tgira da monuments en il Grischun. La restauraziun da la claustra Son Jon (etappa 2012) en la vischnanca da Val Müstair vegn sustegnida cun 187 900 francs. Per reparar la via da communicaziun istorica da la Via veglia dad Avras sco senda da viandar a lunga distanza (2. etappa) en las vischnancas dad Avras, dad Andeer e da Farera vegn concedida ina contribuziun da maximalmain 302 800 francs. A la vischnanca da Rossa vegn concedida ina contribuziun da 14 200 francs per renovar vias e plazzas cun sulada. Duas ulteriuras contribuziuns vegnan pajadas per cuvrir da nov tetgs da plattas-crap a Sta. Maria i.C. ed a Segl. 

Nov uffizi da migraziun e da dretg civil
L'uffizi chantunal da fatgs da polizia e da dretg civil sa numna da nov uffizi da migraziun e da dretg civil dal Grischun (UMDC). Il num vegl da l'uffizi ha chaschunà diversas giadas scumbigls cun organs communals e chantunals da la polizia, en spezial cun la polizia chantunala dal Grischun. Plinavant ha stuì vegnir constatà che la designaziun laschava concluder mo per part las incumbensas principalas da l'uffizi e che la cumparegliabladad cun uffizis d'auters chantuns cun champs d'incumbensas sumegliants n'è betg pli dà oz. Las partiziuns "Asil ed execuziun", "Polizia d'esters e centers da documents d'identitad" sco er il "Post spezialisà per l'integraziun" tractan tuts ils secturs da la migraziun. En connex cun natiralisaziuns s'occupa la partiziun "Dretg da burgais e dretg civil" medemamain da dumondas da la migraziun. In'excepziun essenziala, dentant fitg impurtanta per l'uffizi èn ils fatgs da dretg civil. 
 

Da vischnancas e da regiuns

• Laax: Sin dumonda da la vischnanca da Laax ha la regenza midà ses conclus dals 8 da matg 2012 davart la revisiun totala da la planisaziun locala. Il scumond da construir abitaziuns secundaras, ch'era vegnì ordinà en il conclus per la zona d'abitar en il sectur da la parcella communala sin il territori da Cons, vegn relativà en quel senn che abitaziuns secundaras che vegnan explotadas en il senn da l'ordinaziun dal cussegl federal dals 22 d'avust 2012 vegnan exclusas dal scumond. 
• Vaz: La revisiun parziala da la planisaziun locala ch'è vegnida concludida da la vischnanca da Vaz ils 11 da mars 2012 e che cumpiglia in plan da zonas 1:5000 "Revisiun parziala Rascheinas" vegn approvada. La revisiun parziala prevesa da sminuir la zona per la protecziun da la cuntrada en il sectur da dus manaschis agriculs sin il territori da Rascheinas.
• Susch: Il project da la vischnanca da Susch per construir in cuntschet da la Susasca vegn approvà. I vegn garantida ina contribuziun chantunala da maximalmain 134 750 francs. 
• Mustér: A la corporaziun d'aua Mumpé Medel, vischnanca da Mustér, vegn garantida ina contribuziun pauschala da 119 610 francs per cuvrir ils custs per renovar il reservuar Vitgava. Resalvada vegn la subvenziun da la confederaziun. Da l'import chantunal sto la vischnanca surpigliar ina part da 6 pertschient.

Contribuziuns chantunalas a differentas instituziuns

• ARGO, fundaziun grischuna per lavuratoris e dimoras per persunas cun impediments: A la ARGO, la fundaziun grischuna per lavuratoris e dimoras per persunas cun impediments, vegn garantida ina contribuziun da maximalmain 348 144 francs als custs per la sanaziun energetica dal lavuratori da la ARGO a Tavau. Premessa vegn la garanzia da la finanziaziun restanta. 

Projects da vias
La regenza ha approvà 1,49 milliuns francs per lavurs da construcziun sin il suandant traject:
- via da Ratitsch: lavurs d'impressari, mirs da sustegn

Plinavant ha la regenza approvà il project d'exposiziun per la correcziun da la via dal Scanvetg, traject dal surpassadi da la Viafier retica "Rütland" (kilometer 25,27 fin 25,61). 


Gremi: regenza
Funtauna: rg chanzlia chantunala dal Grischun