Cuntegn da la pagina

La liongia – ina istorgia cun dus pizs

  • Erste Mitteilung
  • Neuen Beitrag einfügen
La talgia da liongia regalada dal mazler cur ch'ins era uffant, la liongia da brassar sin il chartunet a la festa communala u la servela vi dal bastun sur il fieu – la liongia è mintgadi e luxus a medem temp, ella è memoria, individualitad ed experientscha collectiva. A quest bain cultural culinaric è deditgada la nova exposiziun speziala en il museum retic a Cuira.

Il center da la part istorica-etnologica da l'exposiziun furma la batgaria da chasa tradiziunala. Cun agid da numerus objects da la collecziun dal museum retic sco er cun agid da fotografias vegni illustrà, co ch'i vegniva fatg batgaria pli baud sin ils bains purils. Ina staziun da sun che cuntegna regurdientschas raquintadas dat vita a quest eveniment spezial che steva sin il chalender da mintga famiglia da purs. Dasperas vegnan preschentadas anecdotas istoricas davart la liongia.

La segunda part da l'exposiziun mussa ch'ins po esser da different avis, cur ch'i va per la liongia. Co dumogn jau il fatg ch'in animal ha stuì laschar sia pel per mia liongia? Nua e co ha vivì quest animal? Quant sauna è mia liongia? Ha mes consum da charn consequenzas per l'ambient? En intervistas curtas discurran in represchentant da la federaziun professiunala da charn, ina pura biologica, in furber vendider online da liongias ch'è oriund da Berlin ed in impressiunant vegetari da Greenpeace davart ils aspects critics dal consum da liongias.

La diversitad da las liongias da la Svizra vegn celebrada ad ina maisa festiva. Las visitadras ed ils visitaders pon sa tschentar a maisa e scuvrir chaussas interessantas e surprendentas davart las numerusas spezialitads da liongias.

L'exposiziun vegn cumplettada cun in'acziun da liongias d'art. Il museum retic ha envidà quatter artistas giuvnas ed artists giuvens dal Grischun a preschentar lur ovras davart il tema. Esther Schena, Madlaina Janett, Isabelle Meier e Remo Arpagaus mussan, en tge diversas modas che la liongia po inspirar l'art.

La liongia – ina istorgia cun dus pizs, dals 12 d'october 2012 fin ils 3 da mars 2013. Ulteriuras infurmaziuns chattais Vus sut www.rm.gr.ch.


Remartga:
Davart quest tema stat a disposiziun in video sut www.gr.ch
 

Infurmaziuns:
Andrea Kauer Loens, Manadra dal project per l'exposiziun speziala museum retic, tel. 081 257 48 30
 

Gremi: museum retic
Funtauna: rg museum retic
Neuer Artikel