Cuntegn da la pagina

Barbara Janom Steiner al podium da l'archiv grischun per la cultura da las dunnas ed al gieu da ballape da Cuira 97

  • Erste Mitteilung
  • Neuen Beitrag einfügen
La presidenta da la regenza Barbara Janom Steiner realisescha ina seria d'inscunters cun la populaziun grischuna sut il motto "Il Grischun essan nus – la presidenta da la regenza tranter nus". Venderdi proxim vegn Janom Steiner a sa participar al podium "Quai ch'i dovra è passiun" ("Was es braucht, ist Herzblut") da l'archiv grischun per la cultura da las dunnas, e sonda vegn ella a persequitar la partida a chasa dal club da ballape Cuira 97.

La seria d'inscunters "Il Grischun essan nus" maina Barbara Janom Steiner las proximas emnas en tut las trais regiuns linguisticas dal chantun. Sin il program stattan differentas occurrenzas e scuntradas, ch'èn vegnidas proponidas da la populaziun per ina visita da la presidenta da la regenza.

Venderdi, ils 26 d'october 2012, vegn la presidenta da la regenza Barbara Janom Steiner a sa participar al podium da l'archiv grischun per la cultura da las dunnas. Ella discutescha cun interprendidras grischunas davart il tema: "Quai ch'i dovra è passiun". Il podium ha lieu en l'auditori da la banca chantunala grischuna a Cuira. Las portas avran a las 18.00. Il podium cumenza a las 18.30 e dura fin ca. las 20.00. La moderatura è Silke Margherita Redolfi, manadra da l'archiv grischun per la cultura da las dunnas.

Sonda, ils 27 d'october 2012, sa deditgescha ella al sport. La presidenta da la regenza Barbara Janom Steiner vegn a cumenzar a las 16.00 il gieu da ballape da Cuira 97 cunter il CB Widnau ed a dar il culp da partenza. Durant la partida a chasa dal club da ballape il meglier classifitgà dal Grischun sin la plazza da sport Ringstrasse sa chatta la presidenta da la regenza tranter las aspectaturas ed ils aspectaturs e porscha uschia la pussaivladad per in barat spontan cun la populaziun. 


Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01 


Gremi: departament da finanzas e vischnancas
Funtauna: rg departament da finanzas e vischnancas
Neuer Artikel