Cuntegn da la pagina

Communicaziun da la regenza dals 25 d'october 2012

  • Erste Mitteilung
  • Neuen Beitrag einfügen
La regenza grischuna ha prendì posiziun davart l'ordinaziun tar la lescha federala davart la perscrutaziun vi da l'uman. Ultra da quai è ella sa fatschentada cun differentas fatschentas da vischnancas e da regiuns. 

La regenza beneventa ina regulaziun unitara per la perscrutaziun vi da l'uman
Tras l'ordinaziun tar la lescha federala davart la perscrutaziun vi da l'uman (LPU) duai quest gener da perscrutaziun vegnir reglà en moda unitara e cumplessiva. En il chantun Grischun vegn fatga perscrutaziun vi da l'uman mo en ina dimensiun fitg modesta. Correspundentamain è il chantun pertutgà mo a l'ur da quest project. Tenor l'avis da la regenza grischuna èsi correct da professiunalisar l'examinaziun da las pretensiuns eticas envers projects da perscrutaziun. Las regulaziuns previsas intervegnan dentant en la libertad organisatorica chantunala d'enfin ussa, engrevgeschan per part in engaschament raziunal dal persunal e creeschan in squitsch da termins nunnecessari. Qua beneventass la regenza intginas adattaziuns. Plinavant manca ina fasa transitorica che permetta d'introducir las mesiras novas previsas. Plinavant duess la finanziaziun da la cuminanza da lavur da las cumissiuns d'etica (CLCE) vegnir reglada explicitamain. 
 

Da vischnancas e da regiuns
  • Schluein: A la corporaziun d'aua Foppa en la vischnanca da Schluein vegn garantida ina contribuziun da maximalmain 233 628 francs al plan da mesiras "Investiziuns a partir da l'onn 2010" da la serenera Foppa.
  • Trin: Il carnet d'obligaziuns dals 25 da schaner 2012 per il 1. stgalim da l'examinaziun ecologica per il project da concessiun "Engrondiment da l'ovra electrica Pintrun" vegn approvà cun tschertas cumplettaziuns e cundiziuns.
  • Tinizong-Rona: La concessiun dals dretgs da las auas che la vischnanca da Tinizong-Rona ha surdà ils 26 da mars 2010 vegn approvada cun intginas midadas.

Projects da vias
La regenza ha approvà 1 900 000 francs per lavurs da construcziun sin il suandant traject:
- via da Samignun: lavurs d'impressari, punt dal Schergenbach, Mulin da Spiss 


Gremi: regenza
Funtauna: rg chanzlia chantunala dal Grischun
Neuer Artikel