Il chantun Grischun publitgescha dus stipendis d'atelier a Vienna per profilar pli fitg las prestaziuns culturalas.

L'atelier d'abitar (2,5 stanzas) sa chatta al "Bauernmarkt 9" a Vienna, en proxima vischinanza dal dom da s. Steffan. Il chantun Grischun metta a disposiziun gratuitamain las localitads e paja in supplement mensil da 2'200.– francs vi dals custs da viver. La dimora dura per regla mintgamai tschintg mais (1. da favrer 2013 fin ils 30 da zercladur 2013 / 1. d'avust 2013 fin ils 31 da december 2013).
 
Da candidar èn envidads artistas professiunalas ed artists professiunals ch'èn domiciliads dapi almain dus onns en il chantun Grischun u che demussan tras lur tematica e tras lur lieu da lavur ina stretga colliaziun cun la cultura dal Grischun. Plinavant èn admess a la candidatura artistas ed artists ch'èn burgais dal chantun Grischun u ch'èn stads domiciliads pli baud durant almain ventg onns en il chantun Grischun. Las annunzias èn pussaivlas per tut las spartas e n'èn betg liadas a la vegliadetgna. Il termin d'annunzia dura fin ils 30 da november 2012 (data dal bul postal).
 
Ils documents d'annunzia sco er infurmaziuns survegnis Vus sut la suandanta adressa: Promoziun da la cultura dal Grischun, Armon Fontana, Loëstrasse 26, 7000 Cuira tel. +41 (0) 81 257 48 02, e-mail armon.fontana@afk.gr.ch, internet: www.kfg.gr.ch.


Gremi: uffizi da cultura dal Grischun
Funtauna: rg uffizi da cultura dal Grischun