Las purschidas digitalas han fitgà pe en las bibliotecas e sa legran d'in interess creschent. La biblioteca digitala da la Svizra orientala è il meglier exempel per quai. Dapi ch'ella è vegnida lantschada l'onn 2008 èn vegnidas emprestadas gia passa 100 000 medias electronicas. Cun in'emna d'acziun dals 5 fin ils 10 da november 2012 rendan las 20 bibliotecas partenarias attent a lur purschidas.

La biblioteca digitala da la Svizra orientala cun 20 bibliotecas partenarias da tut la Svizra orientala e dal principadi da Liechtenstein sa fa valair sco purschida digitala da biblioteca la pli impurtanta da la Svizra – tant areguard l'intschess cun var in milliun abitantas ed abitants sco er areguard il dumber da medias che stattan a disposiziun, numnadamain 20 000. Encuraschadas da las experientschas positivas planiseschan ussa er ulteriuras bibliotecas da la Svizra tudestga da sa participar al mund digital, tranter quellas las tschintg bibliotecas da citad grondas da Basilea, da Berna, da Lucerna, da Winterthur e da Turitg.

Ils e-readers èn sa fatgs valair
Il success creschent da la purschida dependa dal success dals e-book-readers e dals computers da tablet. Ils affars da Nadal da l'onn passà èn stads caracterisads da quests apparats da leger novs e dapi lura scuntran ins adina pli savens glieud che tegna en maun in apparat da leger digital empè d'in cudesch u d'ina gasetta. La biblioteca digitala da la Svizra orientala pussibilitescha l'access segir e legal als cuntegns respectivs: belletristica, cudeschs tematics u revistas. Ella metta però er a disposiziun numerus cudeschs auditivs e videos.

Uniun d'emprest online la pli veglia
La biblioteca digitala da la Svizra orientala ha lantschà sia activitad ils 14 da matg 2008 sco emprima purschida da l'uschenumnada «Onleihe» en Europa. Il model d'organisaziun è sa cumprovà ed è vegnì copià bleras giadas, perquai ch'el stgaffescha sinergias cun metter a disposiziun ina purschida bler pli gronda e cun realisar respargns tar l'assistenza tecnica.

Emna d'acziun cun concurrenza
Dals 5 als 10 da november 2012 preschentan las bibliotecas lur purschida digitala en il rom d'ina emna d'acziun. Durant quests dis decleran las collavuraturas ed ils collavuraturs da las bibliotecas a tut las persunas interessadas, co che la biblioteca digitala da la Svizra orientala funcziuna. En il rom d'ina concurrenza vegnan ultra da quai tratgs 30 e-book-readers.

Ulteriuras infurmaziuns sut: www.dibiost.ch u www.dibiost.li  

Bibliotecas partenarias da la biblioteca digitala da la Svizra orientala:

• biblioteca chantunala da l'Appenzell dador, Trogen
• biblioteca chantunala da l'Appenzell dadens, Appenzell
• biblioteca chantunala dal chantun Glaruna
• biblioteca chantunala dal Grischun, Cuira
• biblioteca naziunala dal Liechtenstein, Vaduz
• biblioteca chantunala Vadiana, Son Gagl
• bibliotecas da Schaffusa
• biblioteca chantunala da Turgovia, Frauenfeld
• biblioteca Reburg, Altstätten
• biblioteca/ludoteca dad Amriswil
• biblioteca da Buchs SG
• biblioteca communala e da scola dad Ebnat-Kappel
• biblioteca populara da Gossau
• bibliotecas da Rapperswil-Jona
• biblioteca da la scola da citad e da la scola da professiunala Büecherbrugg, Kreuzlingen
• biblioteca da la citad dad Uznach
• biblioteca communala dad Uzwil
• biblioteca regiunala da Weinfelden
• biblioteca da la citad da Wil
• mediateca da la scola da pedagogia da Son Gagl

 
Infurmaziuns:
dr. Christine Holliger, bibliotecaria chantunala dal Grischun, telefon 081 257 28 21 


Gremi: uffizi da cultura dal Grischun
Funtauna: rg uffizi da cultura dal Grischun