Cuntegn da la pagina

Tscherna da professiun: ina decisiun per la vita

  • Erste Mitteilung
  • Neuen Beitrag einfügen
A la fiera da tscherna da professiun FIUTSCHER da quest onn, che ha lieu dals 6 fin ils 11 da november 2012 en la halla da la citad da Cuira, preschenta il post da stab per l'egualitad da las schanzas in'acziun speziala. Passa 20 ambassaduras ed ambassadurs giuvens dal Grischun preschentan sasezs e lur professiun extraordinaria e discuteschan cun giuvenils, cun persunas d'instrucziun e cun geniturs.

Ozendi han ils giuvenils difficultads da tscherner lur professiun. Cun tscherner ina professiun vegn prendida ina decisiun per la vita. Quai n'è betg uschè facil, damai ch'i dat en Svizra 250 diversas professiuns che pon vegnir emprendidas. La gronda part da las mattas e dals mats na resguarda gnanc l'entira paletta da pussaivladads. Ella tscherna anc adina en moda tradiziunala: 70 pertschient da las mattas tschernan ina da diesch professiuns, per il solit dal sectur terziar u da sanadad. Ed ils mats sa deditgeschan a las activitads tecnicas ed artisanalas. Uschia reduceschan ellas ed els sezs inutilmain lur schanzas da chattar ina plazza d'emprendissadi interessanta. Ellas ed els suondan maletgs fixs e manchentan eventualmain la professiun che correspundess meglier a lur abilitads ed a lur giavischs.

Durant l'exposiziun professiunala grischuna per la furmaziun fundamentala ed il perfecziunament professiunal FIUTSCHER, che ha lieu dals 6 fin ils 11 da november 2012 en la halla da la citad da Cuira, fa il post da stab per l'egualitad da las schanzas dal Grischun reclama per ina tscherna da professiun pli averta, pli curaschusa e pli multifara. Al stan dal post da stab sa preschentan giuvenils che han tschernì ina professiun atipica. Las ambassaduras giuvnas fan per exempel l'emprendissadi da polimecanista, da constructura, da scrinaria, da logisticra e d'electronista; ils ambassadurs giuvens represchentan lur professiuns da tgira, d'assistenza u quella da flurist. Lur tratg cuminaivel è, ch'ellas ed els èn anc oz piunieras e piuniers en lur professiun. Lur motivs, lur experientschas e lur cussegls n'èn betg mo interessants per ils giuvenils, mabain er per las persunas d'instrucziun e per ils geniturs.


Infurmaziun:
Las collavuraturas ed ils collavuraturs da las medias vegnan envidads da visitar il stan dal post da stab per l'egualitad da las schanzas a la fiera da tscherna da professiun FIUTSCHER en la halla da la citad da Cuira (directamain a l'entrada). Las ambassaduras ed ils ambassadurs sco er la manadra dal project Claudia Meili-Senn stattan a disposiziun per intervistas.

Infurmaziuns davart la fiera datti sut www.fiutscher.ch


Infurmaziuns:
Claudia Meili-Senn, collavuratura scientifica tar il post da stab per l'egualitad da las schanzas, tel. 081 257 35 73, e-mail: Claudia.Meili@stagl.gr.ch  


Gremi: post da stab per l'egualitad da las schanzas
Funtauna: rg post da stab per l'egualitad da las schanzas
Neuer Artikel