Navigation

Inhaltsbereich

  • Erste Mitteilung
  • Neuen Beitrag einfügen
Sa far in maletg da projects actuals e tschertgar il discurs cun la populaziun: Er las proximas scuntradas da la seria d'inscunters "Il Grischun essan nus – la presidenta da la regenza tranter nus" mainan Barbara Janom Steiner pli datiers a questa finamira. La presidenta da la regenza visita il plazzal da l'ovra electrica en la Valle di Lei e la Bregaglia cun ses territori da cunfin cun l'Italia.

Durant ses onn presidial vul Barbara Janom Steiner tgirar il contact cun la populaziun grischuna en tut las trais regiuns linguisticas dal chantun. Per quest intent ha la presidenta da la regenza envidà l'avust passà la populaziun d'inoltrar propostas per inscunters. Las emnas passadas ha Janom Steiner gia pudì absolver in pèr da quests termins. Er la segunda part da la seria d'inscunters che porta il titel "Il Grischun essan nus – la presidenta da la regenza tranter nus" empermetta inscunters interessants.

Sco proxim vegn Janom Steiner a visitar Avras. Glindesdi, ils 5 da november 2012, va la presidenta da la regenza a guardar il plazzal da las Ovras electricas dal Rain posteriur SA e da la firma Crestageo SA en la Valle di Lei. Per l'emprima giada en l'istorgia da las Ovras electricas vegn il lai da serra Lago di Lei svidà cumplettamain per ch'ils implants possian vegnir renovads totalmain. Perquai che las lavurs da sanaziun vegnan cuntinuadas er l'enviern, ston vegnir construids rempars da lavinas, sur dals quals Janom Steiner vegn a s'infurmar al lieu. La populaziun è envidada da sa participar a questa visita (da las 09.00 a las 11.30).

Sonda, ils 10 da november 2012, è la presidenta da la regenza Janom Steiner – sin invitaziun da l'Associazione La Bregaglia – a Castasegna ed a Villa di Chiavenna en l'Italia vischina. Janom Steiner vegn infurmada d'emprim maun davart ils projects e davart las sfidas actualas da la regiun da cunfin. A Villa di Chiavenna (Italia) vegn la presidenta da la regenza grischuna ultra da quai a sa participar ad ina maisa radunda davart il tema dals cunfinaris. Il punct culminant da questa visita è in inscunter cun la populaziun locala da tuts dus pajais sin la punt da cunfin istorica en vischinanza da la duana veglia (da las 11.00 fiin a las 12.30). Per il divertiment musical e per l'alimentaziun èsi procurà. 
 

Remartga:
Da la seria "Il Grischun essan nus – la presidenta da la regenza tranter nus" stat a disposiziun mintgamai in video en tudestg, en rumantsch ed en talian sut www.gr.ch
 

Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01


Gremi: departament da finanzas e vischnancas
Funtauna: rg departament da finanzas e vischnancas
Neuer Artikel