Cuntegn da la pagina

Inauguraziun da la Scola chantunala Plessur renovada "Chasa Cleric" / Dis da las portas avertas

  • Erste Mitteilung
  • Neuen Beitrag einfügen
La Scola chantunala ha puspè pudì surprender la Scola chantunala Plessur "Chasa Cleric" suenter dus onns da construcziun. Il bajetg resplenda en nova glischur suenter ina renovaziun cumplessiva.

Las bellas, cleras localitads novas, la grondezza da las stanzas da scola ch’èn vegnidas structuradas cumplainamain da nov, la generusa halla d’entrada, ils corridors, sco er ils locals da cuminanza influenzeschan a moda positiva il clima d’emprender, la qualitad da la lavur e la creativitad da las scolaras e dals scolars e lur scolastas e scolasts. L’architectura ed ils indrizs funcziunals han medemamain in bun effect per l’atmosfera, il clima da las relaziuns ed il process d’emprender. Ils roms artistics da nossa scola sustegnan l’educaziun estetica ed intermedieschan bain ils elements ils pli fundamentals per in bun process d’emprender enten promover las abilitads da percepir, d’observar, da sa concentrar e d’esser creativ.

Tenor las directivas dal Chantun Grischun dueva la scola obtegnair ina sanaziun termica, q.v.d. ina transfurmaziun d’in bajetg dals onns 60 en il temp preschent per pudair ademplir en l’avegnir il standard da minergia e da satisfar a tut las normas e prescripziuns vertentas. La sanaziun dueva ultra da quai pussibilitar il nov diever dal bajetg per ils roms musics entaifer il campus da la scola. Anc oz persvada la qualitad optica ed urbanistica da l’implant Cleric. Questa qualitad durabla ha pretendì da tractar il bajetg existent cun gronda precauziun e respect.

Il svilup d’ina sanaziun, che duess interpretar la substanza originala, premetta bunas enconuschientschas dal bajetg e da sias qualitads, las qualas stuevan l’emprim vegnir eruidas. Da questas enconuschientschas è sa sviluppà in concept segnà da fina retegnientscha, ma er dal curaschi d’introducir innovaziuns.

Tgi che visita oz la Canti Plessur vegn a constatar ch’il bajetg dal Seminari scolastic dals onns 60 è vegnì transponì en ina scola en in vestgì istoric cun ina infrastructzra adequata al temp per l’instrucziun en ils roms musics. La nova chasa da scola persvada puncto qualitad ed economia. Ella è garanta per ina orientaziun durabla da la Scola chantunala sco impurtanta instituziun da scolaziun da noss chantun che vul - tenor ses profil directiv - tgirar, intermediar e promover la trilinguitad e la diversitad culturala dal Chantun Grischun. As laschai persvader sezs da quai a chaschun dals dis da las portas avertas dals 09/10 da november 2012. 


Infurmaziuns:
- cusseglier guvernativ Mario Cavigelli, schef dal departament da construcziun, traffic e selvicultura, tel. 081 257 36 01
- Markus Dünner, architect chantunal, uffizi da construcziun auta dal Grischun, tel. 081 257 36 31 
- Gion Lechmann, rectur da la scola chantunala grischuna, tel. 081 257 51 51


Gremi: uffizi da construcziun auta dal Grischun
Funtauna: rg uffizi da construcziun auta dal Grischun
Neuer Artikel