Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha deliberà ina contribuziun d'investiziun per la nova utilisaziun futura da l'ospital da la crusch a Cuira. Ultra da quai è ella sa fatschentada cun differentas fatschentas da vischnancas, per gronda part cun revisiuns da las planisaziuns localas. 

La midada d'utilisaziun da l'ospital da la crusch vegn sustegnida
Il chantun sustegna l'installaziun da letgs da tgira en l'ospital da la crusch a Cuira sco part centrala d'in center per tgira e geriatria per il Grischun central e dal nord. La regenza ha garantì ina contribuziun d'investiziun pauschala da totalmain 522 000 francs per augmentar ils letgs da tgira che han il dretg da survegnir ina contribuziun e per transfurmar chombras da dus letgs en chombras d'in letg.
En l'avegnir duai l'ospital da la crusch disponer da totalmain 24 letgs da tgira en 22 chombras d'in letg ed en 1 chombra da dus letgs. La purschida da letgs da tgira vegn redublada uschia. La restructuraziun sustegna l'intent da desister da manar l'ospital da la crusch sco ospital acut cur ch'il project da construcziun al lieu principal da l'ospital chantunal dal Grischun è realisà. En l'ospital da la crusch duai vegnir stgaffida ina purschida da chombras che ademplescha las premissas per in manaschi sco chasa da tgira. La restructuraziun planisada da la staziun da tgira da lunga durada en ina chasa da tgira independenta cun da nov 24 plazzas en l'ospital da la crusch è ina part da l'utilisaziun futura da l'ospital da la crusch ch'è vegnida iniziada en connex cun la revisiun parziala da la lescha per promover la tgira da persunas malsaunas cun l'intent da concepir da nov la plazza d'ospitals da Cuira (missiva da la regenza al cussegl grond, carnet nr. 6/2005 – 2006, link). 

Preschentaziun ospitanta dal Grischun a la messa da vacanzas a Son Gagl 2013
Cun in'exposiziun speziala davart la persistenza e davart in turissem persistent vegn il chantun Grischun ad esser preschent a la messa da vacanzas che ha lieu a Son Gagl dals 8 fin ils 10 da favrer 2013. Per quest project da messa ha la regenza deliberà 200 000 francs. Plinavant ha ella prendì enconuschientscha d'ina skizza da concept dal post spezialisà per turissem e svilup persistent, Center da Capricorns, Vargistagn.
Sco gia tar la preschentaziun ospitanta dal Grischun a la NATURA 2012 a Basilea (messa e congress per la persistenza dals 13 fin ils 16 d'avrigl 2012) duai il tema da la persistenza vegnir intermedià e rendì vivent sur ina preschentaziun dals parcs d'impurtanza naziunala. Per la messa da vacanzas a Son Gagl 2013 èsi prevesì da profitar uschè bain sco pussaivel dals exponats davart ils parcs grischuns ch'èn gia vegnids preschentads a la NATURA 2012 a Basilea. Da nov vegn vitiers in panorama interactiv dal parc natiral regiunal Beverin. Ultra da quai vegnan preschentadas parts dal center d'infurmaziun futur da l'arena tectonica Sardona sco ch'el duai vegnir installà sin il pass dal Cunclas en la vischnanca da Tumein suenter la messa da vacanzas 2013. 

Mess en vigur la lescha dal guaud e revedì parzialmain las directivas per occurrenzas en il guaud
La nova lescha chantunala davart il guaud vegn messa en vigur il 1. da schaner 2013. L'aboliziun da l'ordinaziun chantunala davart il guaud e la revisiun parziala da l'ordinaziun d'expropriaziun dal chantun Grischun entran er en vigur il 1. da schaner 2013.
Ultra da quai ha la regenza adattà las directivas per realisar occurrenzas organisadas en il guaud. Da nov sto stringentamain vegnir consultà l'uffizi chantunal da guaud e privels da la natira avant che realisar occurrenzas grondas en il guaud. En il center stat en quest connex la funcziun consultanta. Ultra da quai vegnan inditgadas da nov en l'ordinaziun er cuntradas da palì sco lieus da conflict. 

Contribuziuns a mesiras da la tgira da monuments
La regenza ha deliberà contribuziuns a mesiras da la tgira da monuments en ina summa totala dad 89 400 francs. Tranter auter èn quai contribuziuns per restaurar il chor da la baselgia da la claustra da las dominicanas da Glion sco er per lavurs da sanaziun da la chasa-pravenda da Degen. 
 

Da vischnancas e da regiuns
  • Zizers: La revisiun totala da la planisaziun locala da la vischnanca da Zizers dals 27 da november 2011 vegn approvada. La revisiun totala cuntegna ina nova lescha da construcziun sco er repassaments dals plans d'utilisaziun. In punct central da la revisiun totala è tranter auter stà quel da stgaffir terren da construcziun. Concretamain hai dà novas enzonaziuns en ils territoris Rangs I, Rangs II, Stöckli, Rüfe, Garage Stock e Gerbi.
  • Trimmis: La nova lescha da construcziun, concludida da la vischnanca da Trimmis ils 26 da mars 2012, sco er il plan da zonas 1:2000, 1:10 000 Legendas (midada) dals 14 da matg 2012 vegnan approvads. La nova lescha da construcziun per l'entir territori communal (Trimmis e Says) è vegnida adattada als relaschs chantunals davart la planisaziun dal territori.
  • Lon: La revisiun parziala da la planisaziun locala, concludida da la vischnanca da Lon ils 8 da zercladur 2012, vegn approvada. Cun la revisiun parziala vegn realisà tranter auter il plan directiv regiunal "Cuntrada da cultura cun edifizis marcants per la cuntrada (EMC) Val Schons: Andeer, Casti-Vargistagn, Lon, Pignieu".
  • Sursaissa: La revisiun parziala da la planisaziun locala ch'è vegnida concludida da la vischnanca da Sursaissa ils 22 da zercladur 2012 e che cumpiglia in plan da zonas 1:1000 Girgarta ed in plan da zonas 1:1000 Under Misanenga vegn approvada. Ils cunfins da las zonas vegnan fixads en moda cunvegnenta per cuntanscher uschia ina meglra surbajegiada da las parcellas pertutgadas.
  • Samedan: La revisiun parziala da la lescha da construcziun, concludida da la vischnanca da Samedan ils 5 da fanadur 2012, vegn approvada. La revisiun parziala stat en connex cun il relasch d'ina nova lescha davart il provediment d'aua e davart il tractament da l'aua persa.
  • Schiers: La revisiun parziala da la planisaziun locala da la vischnanca da Schiers dals 9 da mars 2012 vegn approvada per part. Ils plans generals d'avertura ch'èn vegnids adattads tar las vias e sendas da viandar ston vegnir repassads. Ultra da quai vegn la vischnanca incumbensada anc ina giada da fixar cumplettamain sia rait da vias e da sendas da viandar.
  • Val Stussavgia: La nova constituziun da la vischnanca da Val Stussavgia (da nov per il 1. da schaner 2013) dals 23 d'avust 2012 vegn approvada.
  • Lumnezia: La nova constituziun da la vischnanca da Lumnezia (da nov per il 1. da schaner 2013) dals 23 da settember 2012 vegn approvada.
  • Lostallo: La revisiun parziala da la constituziun communala da la vischnanca da Lostallo dals 17 da schaner 2011 vegn approvada. Adattadas èn vegnidas la cumpetenza d'expensas da la suprastanza communala sco er las tariffas d'indemnisaziun da las commembras e dals commembers da las autoritads.
  • Vignogn: Als custs supplementars per renovar la rait da vias champestras da la vischnanca da Vignogn vegn garantida ina contribuziun da maximalmain 16 000 francs. Premess vegn il pajament da la contribuziun federala. 

 
Contribuziuns chantunalas a differentas instituziuns
  • Institut per la perscrutaziun da la cultura grischuna: Il project scientific da perscrutaziun "Il cudesch en il Grischun (1500 – 1800)" da l'institut per la perscrutaziun da la cultura grischuna vegn sustegnì cun 70 000 francs en ina emprima fasa. Cun il project da perscrutaziun duain las bibliotecas e las collecziuns istoricas da cudeschs dals onns 1500 fin 1800 da las Trais Lias vegnir registradas, descrittas ed evaluadas per l'emprima giada sistematicamain.


Projects da vias

La regenza ha approvà 1 750 000 francs per lavurs da construcziun sin il suandant traject:
- via naziunala A28: lavurs d'impressari e da cuvrida, sviament da Saas, Pagrüeg - Mezzaselva, sort 2 


Gremi: regenza
Funtauna: rg chanzlia chantunala dal Grischun
Neuer Artikel