Cuntegn da la pagina

D'in gea ils 25 da november profitescha il turissem grischun

  • Erste Mitteilung
  • Neuen Beitrag einfügen
La lescha chantunala davart las taxas turisticas (LTT) vegn discutada intensivamain avant la votaziun dals 25 da november 2012. Per prestar ina contribuziun a favur da la furmaziun d'opiniun e pervia da la gronda impurtanza dal project da votaziun prenda la regenza grischuna anc ina giada curt posiziun en chaussa.

Las votantas ed ils votants dal Grischun decidan ils 25 da november 2012 davart in pass da refurma impurtant dal turissem grischun. Cun la lescha davart las taxas turisticas (LTT) vegn stgaffida la basa finanziala per in turissem grischun pli cumpetitiv. La lescha vul integrar solidaricamain en la finanziaziun tut quellas e quels che profiteschan dal turissem. Ella remplazza 120 relaschs communals e sustegna las structuras turisticas intercommunalas ch'èn vegnidas installadas ils ultims onns.

La regenza è da l'avis ch'in gea a la LTT è decisiv per ch'il nov posiziunament dal turissem grischun haja success er vinavant. La finanziaziun che vegn reglada en moda unitara rinforza las regiuns turisticas en il chantun a lunga vista e las permetta d'agir autonomamain grazia a meds finanzials garantids. Da bleras varts vegn discutada la dumonda, tgi che presta da nov ina contribuziun tenor la lescha. Ina pitschna explicaziun latiers suonda.

La LTT na chaschuna nagina nova taglia generala per la populaziun dal Grischun. La lescha prevesa ina taxa ch'è graduada en moda gista per interpresas d'alloschament, per proprietarias e proprietaris d'abitaziuns da vacanzas sco er per mastergnantas e mastergnants che profiteschan differentamain dal turissem tut tenor la regiun e tut tenor la branscha. Lur contribuziuns restan en las regiuns turisticas e sustegnan là las infrastructuras sco er l'installaziun e la vendita da purschidas turisticas (marketing). Davart l'autezza da la taxa decidan las vischnancas sezzas – en coordinaziun cun la strategia turistica da lur regiun e destinaziun. 

Uniuns da sport
Betg obligadas da pajar taxas èn uniuns sco uniuns da sport, uniuns da musica e.u.v. Pertutgads da la LTT èn ultra d'alloschadras, d'alloschaders, da proprietarias e da proprietaris d'abitaziuns da vacanzas interpresas, sco interpresas da commerzi, da mastergn, d'industria e da servetsch. Quellas han finamiras economicas. Las uniuns servan ad intents ideals e n'èn betg talas interpresas. Ellas n'èn pia betg pertutgadas da la LTT. Ultra da quai na profiteschan uniuns betg dal turissem. In profit han mo quellas e quels che cuntanschan avantatgs economics grazia al turissem. Quai manca dal tuttafatg tar las uniuns. 

Aclas e chamonas da chatscha
Betg obligadas da pajar taxas èn simplas chamonas d'acla e chamonas da chatscha. La noziun "simpel" serva a far il cunfin tranter quellas e las chasas da vacanzas. La regla è pia: chasas da vacanzas èn suttamessas a la taxa, aclas dentant betg. Cuntrari a chasas da vacanzas na cuntanschan aclas betg in profit cun il turissem – ellas na profiteschan strusch da l'infrastructura turistica e da servetschs turistics. Il criteri n'è betg l'avertura, mabain il profit. Aclas che vegnan dadas en locaziun a giasts cunter in pajament confurm al martgà han in profit ed èn perquai suttamessas a la taxa. 

Ospitals, spitex sco er chasas da persunas attempadas e da tgira
Tenor la lescha chantunala da taglia èn ils ospitals, la spitex sco er las chasas da persunas attempadas e da tgira liberads da las taglias generalas. Tgi ch'è liberà da las taglias generalas, è er liberà da la taxa turistica. Ina instituziun ch'è liberada da la taglia stuess mo pajar ina taxa, sch'ella entrass en in sectur sco interpresa sin il martgà en concurrenza cun purschiders privats e sche quest sectur predominass. Quai n'è betg il cas tar ils ospitals publics, ma bain per exempel tar la banca chantunala grischuna.

La regenza grischuna è persvadida che la refurma dal turissem grischun currenta po vegnir cuntinuada cun success cun in gea al project da votaziun chantunal ils 25 da november 2012. La LTT presta ina contribuziun impurtanta per l'economia publica futura da l'entir chantun muntagnard. 
 

Infurmaziuns:
cusseglier guvernativ Hansjörg Trachsel, schef dal departament d'economia publica e fatgs socials, tel. 081 257 23 01 
 

Gremi: regenza
Funtauna: rg chanzlia chantunala dal Grischun
Neuer Artikel