Giuvenils ston sa decider baud en tge direcziun che lur vita duai ir. La purschida da professiuns è però fitg gronda. In agid dat FIUTSCHER; l'exposiziun professiunala grischuna per la furmaziun fundamentala ed il perfecziunament professiunal permetta in sguard cumplessiv en il mund da lavur. Er il chantun Grischun è preschent en la halla da la citad da Cuira anc fin dumengia, ils 11 da november 2012.

Per la segunda giada suenter l'onn 2010 avra l'exposiziun professiunala grischuna per la furmaziun fundamentala ed il perfecziunament professiunal FIUTSCHER sias portas. Da mardi, ils 6, fin dumengia, ils 11 da november 2012, vegnan preschentadas quest onn passa 250 professiuns e purschidas da furmaziun supplementara a 78 stans en la halla da la citad da Cuira. Divers stans porschan er ina invista en la diversitad da las professiuns tar l'administraziun chantunala sco er dals centers da furmaziun dal chantun.
La cussegliaziun da professiun, da studi e da carriera ha endrizzà vi da ses stan in minicenter d'infurmaziun professiunala. Persunas spezialisadas infurmeschan davart las pussaivladads da scolaziun e da furmaziun supplementara. Particularmain infurmativa è la plattafurma d'annunzia che dat ina resposta a la dumonda: "Co m'annunziel jau en moda correcta?".
A ses stan fa il post da stab chantunal per l'egualitad da las schanzas reclama per ina tscherna da professiun atipica. Dunnas giuvnas che fan in emprendissadi sco polimecanista, constructura u electronista raquintan da lur mintgadi en l'emprendissadi. Umens giuvens descrivan sco ch'igl è dad esser anc adina in piunier sco tgirunz, sco assistent u sco flurist masculin. Al stan da l'atelier d'emprendissadi per la creaziun da vestgadira dal Grischun demonstreschan las emprendistas lur creativitad. Or da tetrapacks fan ellas bursas. Ils emprendists da l'uffizi da guaud e privels da la natira porschan in'attracziun speziala. Las visitadras ed ils visitaders pon empruvar al lieu, sch'ellas ed els fissan adattads sco bostgeras e bostgers, il medem mument pon ellas ed els sa participar ad ina concurrenza. Er il center da furmaziun e cussegliaziun agricula Plantahof è represchentà a la fiera. Ils emprendists infurmeschan davart lur professiuns en connex cun l'agricultura. Tgi che s'interessa plitost per ina professiun en il sectur da la sanadad e dals fatgs socials è al dretg lieu al stan dal center da furmaziun per la sanadad ed ils fatgs socials (CSS). Da nov è l'exposiziun averta er la dumengia. Spetgads vegnan vers 4000 scolaras e scolars, bleras magistras e blers magisters da tut las regiuns dal chantun Grischun. 

Remartga:
Davart quest tema stat a disposiziun in video sut www.gr.ch.  


Infurmaziuns:
Justina Simeon, manadra da la cussegliaziun da professiun, da studi e da carriera, tel. 081 257 27 05 


Gremi: uffizi per la furmaziun professiunala dal Grischun
Funtauna: rg uffizi per la furmaziun professiunala dal Grischun