La conferenza da las regenzas dals chantuns alpins (CRCA) ha elegì il cusseglier guvernativ dal Grischun Mario Cavigelli sco ses nov president. El suonda il cusseglier guvernativ da l'Uri Markus Züst che ha presidià la conferenza durant ils ultims quatter onns.

Suenter sia elecziun ha cusseglier guvernativ Mario Cavigelli engrazià ses antecessur, cusseglier guvernativ Markus Züst, per sia lavur engaschada e per ses success a favur dals chantuns alpins. Markus Züst haja dumagnà excellentamain dossiers difficils sco l'augment dal tschains d'aua e la realisaziun da l'iniziativa cunter las abitaziuns secundaras. Er il process da la structuraziun da nov da la CRCA haja el terminà cun success. Cusseglier guvernativ Cavigelli è sa mussà persvadì che la CRCA saja necessaria sco cuntrapais politic cunter ils territoris metropolitans per betg periclitar l'equiliber entaifer la Svizra e per pudair mantegnair l'influenza da las regiuns ruralas e dals territoris da muntogna en la politica federala. Ina incumbensa impurtanta en quest connex saja da concentrar las forzas da numerus acturs e da laschar discurrer il territori da muntogna cun ina vusch. Sco accents tematics dals proxims onns numna il president ils secturs energia, organisaziun dal territori, finanzas, traffic e collavuraziun internaziunala.
En il sectur d'energia sa tracti d'observar e d'accumpagnar la strategia d'energia 2050 da la confederaziun. En il sectur da las finanzas e da las taglias vegnan a star sin l'agenda temas sco la NGF, la refurma fiscala ecologica, l'indossament da las grevezzas da la confederaziun als chantuns sco er las prescripziuns d'execuziun da la confederaziun che chatschan ad aut ils custs. En il sectur dal traffic vegnan ils chantuns alpins a stuair sa fatschentar oravant tut cun temas sco il tunnel da via tras il Gottard, il traffic che traversa las Alps, il subvenziunament da vias en regiuns muntagnardas, la politica da spustament ed il mantegniment dal traffic regiunal. Er en il sectur da la planisaziun dal territori vesa il president in champ d'acziun impurtant. Uschia vegn la CRCA ad accumpagnar vinavant activamain las lavurs da realisaziun da l'artitgel da las abitaziuns secundaras. La finala vegnan ils chantuns alpins er ad intensivar la collavuraziun cun regiuns da l'exteriur.

Cooperaziun tar la strategia macroregiunala da las Alps
Cusseglier guvernativ Markus Züst ha represchentà da curt la CRCA a Puntina a la Conferenza dals stadis alpins e da las regiuns alpinas. Il president da la Republica da l'Austria Heinz Fischer, il cumissari da la UE Johannes Hahn e commembras e commembers da regiuns alpinas da la Frantscha, da l'Italia, da la Germania, da l'Austria e da la Svizra han debattà davart il tema "Strategia macroregiunala da las Alps". En ses discurs ha Markus Züst renvià al fatg ch'ina part essenziala da la chadaina da las Alps vegnia occupada dals chantuns alpins svizzers e ch'i saja perquai evident ch'ils territoris alpins svizzers fetschian part d'ina strategia da las Alps. El ha renvià al fatg che la CRCA vesia ina schanza da prender per mauns en moda pli efficazia e colleghiala sfidas cuminaivlas e da trair meglier a niz ils potenzials dal territori alpin. Gist en connex cun ils temas energia, aua, clima e traffic sajan dumandadas strategias cun in grond sustegn. Uschia possia la midada a furmas alternativas da la producziun d'electricitad avair success mo en il rom d'in concept transcunfinal davart la producziun, davart la conservaziun e davart la distribuziun d'energia. Er vegnian ils giavischs dal territori alpin en dumondas dal traffic prendids serius mo, sche sias regiuns sa fetschian valair cun vusch unida envers ils stadis ed envers las instituziuns da la UE. Las regiuns alpinas èn sa cunvegnidas gia il zercladur 2012 ad ina iniziativa cuminaivla per ina strategia macroregiunala da las Alps. A Puntina han las participantas ed ils participants da la conferenza fixà ils proxims pass. Uschia duai quest tema anc vegnir tractà dal cussegl europeic il december 2012. La primavaira 2013 ha lieu la proxima scuntrada da las actuas e dals acturs a Milaun.


La conferenza da las regenzas dals chantuns alpins – in curt purtret
La conferenza da las regenzas dals chantuns alpins (CRCA) è vegnida fundada l'onn 1981. Oz fan part da la conferenza las regenzas dals chantuns Uri, Sursilvania, Sutsilvania, Glaruna, Grischun, Tessin e Vallais. Al cumenzament sa restrenscheva ses intent sin la coordinaziun da dumondas en connex cun l'utilisaziun da la forza idraulica. En il fratemp è vegnì extendì l'intent da la CRCA. Oz vul ella cuntanscher ina represchentaziun communabla da tut ils interess specifics da las muntognas, e quai en Svizra ed a l'exteriur. I sa tracta particularmain dals temas aua ed utilisaziun da la forza idraulica, traffic, turissem sco er service public en general. Ina incumbensa actuala impurtanta è la cooperaziun tar la concepziun da la nova politica regiunala (NPR) da la confederaziun. La surfatscha dals set chantuns ch'èn sa reunids a la CRCA correspunda a 43 % da la surfatscha totala da la Svizra. En ils chantuns da la CRCA vivan 1 milliun persunas u 13 % da la populaziun svizra. La spessezza media da la populaziun en il perimeter da la CRCA importa ca. 70 persunas per kilometer quadrat (Svizra: 176 persunas/km2). Il presidi da la CRCA vegn midà en intervals regulars tranter ils chantuns.


Infurmaziuns:
- cusseglier guvernativ dr. Mario Cavigelli, president da la CRCA, tel. 081 257 36 01
- Fadri Ramming, secretari general da la CRCA, tel. 081 250 45 61
 

Gremi: conferenza da las regenzas dals chantuns alpins (CRCA)
Funtauna: rg conferenza da las regenzas dals chantuns alpins (CRCA)