La presidenta da la regenza Barbara Janom Steiner ha realisà las emnas passadas ina seria d'inscunters en tut las trais regiuns linguisticas dal chantun. Per la fin da la seria, che stat sut il motto "Il Grischun essan nus – la presidenta da la regenza tranter nus", visita Janom Steiner Roveredo e San Murezzan.

Venderdi, ils 23 da november 2012, è la presidenta da la regenza Barbara Janom Steiner a Roveredo. Quai sin invitaziun da la regiun Mesolcina. A partir da las 18.00 ha lieu en il center administrativ chantunal da Roveredo ina scuntrada cun represchentantas e represchentants da las vischnancas e da las federaziuns dal Mesauc. Disctuadas vegnan tranter auter las lavurs en connex cun la nova emprova da refurmar la gulivaziun da finanzas chantunala. A las 19.15 è previs in inscunter cun las medias.

In'emna pli tard, venderdi, ils 30 da november 2012, avra la presidenta da la regenza Janom Steiner la stagiun da skis 2012/2013 a San Murezzan. A las 17.30 dat Janom Steiner liber la pista da skis per il "St. Moritz City Race". Questa pista è vegnida installada en il vitg da San Murezzan aposta per quest eveniment. Suenter vegn Janom Steiner a sa maschadar tranter la populaziun preschenta. Fin a la surdada dals premis exista la pussaivladad d'in barat informal. 
 

Infurmaziuns:
presidenta da la regenza Barbara Janom Steiner, scheffa dal departament da finanzas e vischnancas, tel. 081 257 32 01


Gremi: departament da finanzas e vischnancas
Funtauna: rg departament da finanzas e vischnancas