Zum Seiteninhalt

Communicaziun da la regenza dals 22 da november 2012

  • Erste Mitteilung
  • Neuen Beitrag einfügen
En sia ultima sesida ha la regenza grischuna tranter auter deliberà contribuziuns. 

Da vischnancas e da regiuns
  • Sent: La revisiun parziala da la planisaziun locala che la vischnanca da Sent ha concludì ils 25 da settember 2011 per engrondir l'areal per l'explotaziun da gera "Panas-ch Sura" vegn approvada per part. Ina part dal territori da la chava da gera duai vegnir attribuida ad ina zona da mastergn. Quai stat però en in conflict cun l'obligaziun vertenta planisada da prestar ina cumpensaziun per la protecziun da la natira. Perquai vegn sistida la procedura d'approvaziun per la zona da mastergn engrondida.
  • Engiadina bassa: L'adattaziun dal plan directiv regiunal "Explotaziun da material e gestiun da ruments", concludida da la corporaziun regiunala Pro Engiadina bassa ils 3 d'avrigl 2012, vegn approvada. Il plan directiv chantunal vegn adattà correspundentamain.
  • Casti: A la vischnanca da Casti vegn garantida ina contribuziun chantunala da construcziun pauschala da 361 300 francs per engrondir la chasa da scola Cumpogna. A partir da l'onn da scola 2013/14 duai tut il stgalim superiur da la Val d'Alvra vegnir instruì unicamain en il center regiunal da scola superiura a Casti.
  • Arosa: La lescha da taglia dals 4 da november 2012 da la nova vischnanca dad Arosa, fusiunada per il 1. da schaner 2013, vegn approvada.
  • Lumnezia: La lescha da taglia dals 23 da settember 2012 da la nova vischnanca da Lumnezia, fusiunada per il 1. da schaner 2013, vegn approvada.

Contribuziuns chantunalas a differentas instituziuns
  • Immo holistica Engiadina SA, Susch: La regenza sustegna l'engrondiment da la clinica holistica Engiadina, l'emprima clinica da burnout svizra a Susch. Per augmentar la capacitad da la clinica cun cumprar e renovar l'hotel "Steinbock" vegn garantida ina contribuziun chantunala da 300 000 francs. En l'hotel vegnan stgaffidas 15 stanzas novas e 6 localitads da terapia per la clinica da burnout. Las investiziuns vegnan fatgas sur la Immo holistica Engiadina SA fundada da nov. Grazia a l'engrondiment pon vegnir stgaffidas 15 plazzas da lavur novas.
    La clinica holistica Engiadina a Susch è vegnida inaugurada l'onn 2010. Ella è s'etablida entaifer curt temp sin il martgà da sanadad e figurescha er sin la glista dals ospitals dal chantun Grischun.


Gremi: regenza
Funtauna: rg chanzlia chantunala dal Grischun

Neuer Artikel