Cuntegn da la pagina

La cumissiun predeliberanta beneventa la fusiun en il Scanvetg

  • Erste Mitteilung
  • Neuen Beitrag einfügen
La cumissiun predeliberanta dal cussegl grond sustegna unanimamain la fusiun da las vischnancas d'Arosa, Calfreisen, Castiel, Langwies, Lüen, Molinis, Peist e St. Peter-Pagig a la nova vischnanca d'Arosa.

En sia missiva dals 28 d'avust 2012 propona la regenza dal chantun Grischun al cussegl grond d'approvar la fusiun da las vischnancas d'Arosa, Calfreisen, Castiel, Langwies, Lüen, Molinis, Peist e St. Peter-Pagig a la nova vischnanca d'Arosa. La fusiun duai vegnir realisada per il 1. da schaner 2013. Sut il presidi dal deputà Ernst Casty ha la cumissiun predeliberanta dal cussegl grond predeliberà questa fatschenta per mauns dal cussegl grond che vegn a la tractar en la sessiun da december 2012. A la sesida èn sa participads er la presidenta da la regenza Barbara Janom Steiner sco er la presidenta ed ils presidents da las vischnancas pertutgadas.

Las votantas ed ils votants d'Arosa, Calfreisen, Castiel, Langwies, Lüen, Molinis, Peist e St. Peter-Pagig han approvà la fusiun da lur vischnancas a la nova vischnanca d'Arosa ils 17 da zercladur 2012. La cumissiun predeliberanta dal cussegl grond è sa laschada infurmar al lieu da represchentantas e da represchentants da las vischnancas e da las autoritads davart il project da fusiun. Suenter ina debatta intensiva ha ella decidì unanimamain da proponer al cussegl grond d'approvar la fusiun da las vischnancas d'Arosa, Calfreisen, Castiel, Langwies, Lüen, Molinis, Peist e St. Peter-Pagig e da metter en vigur il conclus per il 1. da schaner 2013. La cumissiun è persvadida ch'i sa tracta d'ina fusiun gista, impurtanta e raschunaivla, da la quala resorta ina vischnanca nova e ferma per il chantun Grischun. Perquai che tut las vischnancas appartegnan al medem circul, al medem district sco er a la medema regiun, n'ha questa fusiun naginas autras consequenzas.

Cun questa fusiun tracta il cussegl grond en la proxima sessiun da december ina da quatter fusiuns da vischnancas da l'onn 2012. Las fusiuns en la Val Stussavgia e da Ramosch e Tschlin ha il cussegl grond gia deliberà. Sch'il cussegl grond acceptass er las fusiuns en il Scanvetg ed en la Lumnezia (medemamain en la sessiun da december 2012) dessi en il chantun Grischun per il 1. da schaner 2013 anc 158 vischnancas. 
 

Infurmaziuns:
president da la cumissiun Ernst Casty, tel. 079 445 48 01


Gremi: cumissiun predeliberanta per la fusiun a la vischnanca d'Arosa
Funtauna: rg cumissiun predeliberanta per la fusiun a la vischnanca d'Arosa
Neuer Artikel