Navigaziun principala

Cuntegn da la pagina

Communicaziun da la regenza dals 29 da november 2012

  • Erste Mitteilung
  • Neuen Beitrag einfügen
La regenza grischuna ha approvà differentas contribuziuns. Uschia per exempel a favur da la preschentaziun dal chantun Grischun al Marché-Concours national de chevaux 2013 a Saignelégier ed a favur da la construcziun d'in nov vial da bus a Cuira. 

Ils chantuns Grischun e Glaruna al Marché-Concours national de chevaux 2013 a Saignelégier
Ils chantuns Grischun e Glaruna èn l'onn proxim ils chantuns ospitants al Marché-Concours national de chevaux 2013 a Saignelégier (Giura). Per la preschentaziun ha la regenza grischuna garantì ina contribuziun da maximalmain 300 000 francs. Plirs dieschmilli aspectaturas ed aspectaturs sa scuntran mintga onn durant la segunda fin d'emna d'avust a Saignelégier per visitar las exposiziuns e las cursas da chavals sco er per assister a las preschentaziuns ed al cortegi folcloristic da la festa da chavals la pli gronda da la Svizra. Il chantun ospitant survegn mintgamai l'occasiun da preschentar ad in vast public sasez e sia cultura, sias spezialitads e sias chaussas da mintgadi sco er atgnas contribuziuns davart il tema chaval. Ils chantuns Grischun e Glaruna èn sa decidids da sa preschentar l'onn 2013 cun las valurs "tradiziuns e cosmopolitissem – traditionsbewusst und weltoffen". Per quest intent è vegnì creà il slogan: "Autas muntognas e Francas Muntognas: rendez-vous sin ils culms". La preschentaziun vegn organisada da l'uniun Grischun vacanzas e da Turissem da Glaruna. Il program accumpagnant vegn concepì da diversas musicistas e da divers musicists sco er da pliras gruppas dals dus chantuns. 
 

Da vischnancas e da regiuns
  • Cuira: La construcziun d'in nov vial da bus sin la Masanserstrasse, traject Ringstrasse fin Giacomettistrasse, vegn renconuschida sco mesira cun dretg da survegnir contribuziuns per promover il traffic public da persunas. Als custs totals da 2 250 000 francs vegn garantida ina contribuziun chantunala da 995 000 francs. Il project serva al traffic da bus regiunal che vegn finanzià dal chantun e che cursescha tranter Cuira e Haldenstein, Trimmis e Vaz sut resp. Zizers-Igis (via A13). Grazia al nov vial da bus pon ils bus circular en moda pli fidada. Ultra da quai po vegnir augmentada la segirezza da las passagieras e dals passagiers che entran e sortan dal bus sco er da las velocipedistas e dals velocipedists.
  • Küblis, Luzein: Il project d'exposiziun per il nov trassé da la via da St. Antönien, traject "Röza – bi der Suscht" vegn approvà cun cundiziuns. Il project cuntegna in nov access a la via naziunala N28 en il territori da Dalvazza (Röza). Il trassé è vegnì concepì uschia che la viafier retica vegn suttraversada. Suenter vegn construì in nov trassé fin en il territori "bi der Suscht", nua ch'el sbucca en la via existenta che maina a Luzein – Pany – St. Antönien.
  • Trun: Il project d'exposiziun per la correctura da la via da Zignau, traject punt Val Zavragia Zignau, kilometers 0,53 fin 0,61, vegn approvà cun cundiziuns. Il project prevesa da destruir la punt ch'è vegnida construida l'onn 1930 sur l'aual da Zavragia e da la remplazzar tras ina punt nova.
  • Tusaun: Ils reglaments per las zonas da protecziun ed ils plans da las zonas da protecziun per las funtaunas dal provediment d'aua public da la vischnanca da Tusaun (pumpas Compogna ed aual da Cazas sco er funtaunas Crapteig, Nolla sura e Hirmi) vegnan approvads.

Contribuziuns chantunalas a differentas instituziuns
  • Uniun XXIV. gieus olimpics d'enviern en il Grischun 2022: A l'uniun XXIV. gieus olimpics d'enviern en il Grischun 2022 vegn garantida ina contribuziun chantunala supplementara da 500 000 francs, quai vul dir en tut maximalmain 900 000 francs, per elavurar il dossier da candidatura naziunal XXIV. gieus olimpics d'enviern en il Grischun 2022. Resalvada resta la concessiun dal credit tras il cussegl grond. La regenza premetta plinavant che las vischnancas da San Murezzan e da Tavau concedian ensemen almain in import da medema grondezza e che la confederaziun e Swiss olympic garanteschian ensemen almain in import dubel uschè grond sco quel dal Grischun.
    L'augment da la contribuziun a l'uniun XXIV. gieus olimpics d'enviern dal Grischun 2022 stat en connex cun in approfundaziun da las lavurs vi dal dossier per ina candidatura a l'Olimpiada. A l'uniun resultan tras quai custs persunals e materials pli auts. Sch'il resultat da la votaziun dal pievel dals 3 da mars 2013 è positiv, vegn questa contribuziun messa a quint a la contribuziun chantunala dad 8 milliuns francs a favur da la candidatura internaziunala.
  • Ospital da l'Engiadin'ota: A l'ospital da l'Engiadin'ota vegn garantida ina contribuziun da totalmain 410 000 francs (chantun e confederaziun) al project "Institut da perscrutaziun per la biomecanica da sport alpina (CASB)", e quai en il rom da la nova politica regiunala da la confederaziun (NPR). Il project cuntegna l'installaziun d'in nov institut da perscrutaziun per la biomecanica da sport a Samedan. En stretga collavuraziun cun l'ospital universitar da Basilea sco er cun ils partenaris da l'industria vegni fatg en l'institut planisà perscrutaziun applitgada cun la finamira da sviluppar novs products da la tecnica medicinala e novas proceduras en ils secturs da la reabilitaziun e da la prevenziun cunter donns.
  • Tgira da monuments: Il chantun sa participescha cun totalmain 55 100 francs a las lavurs da restauraziun da la "Ponte sul Lovero" a Castasegna sco er a la restauraziun da la "Chiesa cattolica Madonna della Pace Sant'Anna" a Roveredo.

Gremi: regenza
Funtauna: rg chanzlia chantunala dal Grischun
Neuer Artikel