In puzzle enorm amez la plazza federala a Berna, occurrenzas en tut ils chantuns, ina marca postala speziala, ina publicaziun festiva – l'onn 2012 è la mesiraziun uffiziala svizra stada en il vair senn dal pled il punct central. Igl è vegnì festivà il giubileum da 100 onns da questa instituziun. 

Sch'ina dama pli passada survegn 100 onns, vegni festivà. Uschia er, sch'i sa tracta da la mesiraziun uffiziala. Ma tgi che crai ussa che questa instituziun saja vegnida en ils onns, sa sbaglia. En ses onn da giubileum è ella sa mussada moderna e frestga sco anc mai. La publicitad ha adina puspè gì la chaschun da vegnir en contact cun il tema mesiraziun, e la populaziun svizra ha savens fatg diever da questa pussaivladad.

Cun ina festa populara bain visitada è l'onn da giubileum vegnì avert il cumenzament da matg sin la plazza federala a Berna. Davant la chasa federala ed en preschientscha da blera glieud mirvegliusa è vegnì mess ensemen il puzzle il pli grond da la Svizra. In'exposiziun da giubileum ha infurmà davart las incumbensas e la moda da lavurar da la mesiraziun uffiziala.

Mez matg è lura vegnì festivà en tut la Svizra il "Di da la mesiraziun uffiziala" sut il motto "punct central": Posts spezialisads chantunals da mesiraziun e numerus biros privats d'inschigneras geometras e d'inschigners geometers han organisà las occurrenzas las pli differentas en il rom dal giubileum. 

En il chantun Grischun han l'uniun d'inschigneras geometras e d'inschigners geometers dal Grischun (IGGR), la federaziun professiunala geosuisse, secziun Grischun, e l'uffizi d'agricultura e da geoinfurmaziun organisà e realisà il matg a Cuira, en il rom da la fiera da primavaira Higa, in'exposiziun speziala davart la mesiraziun uffiziala. Uschia han bleras visitadras e visitaders pudì sa far in maletg dal mintgadi da mesiraziun e dals products da la mesiraziun uffiziala. Plinavant han ins pudì admirar il center geografic dal Grischun, il Crap Furò, sin in model tridimensiunal dal Parc Ela. Il november, a chaschun d'ina segunda occurrenza en il rom da l'exposiziun professiunala Fiutscher a Cuira, è vegnida preschentada spezialmain als giuvenils la professiun da la geomaticra resp. dal geomaticher. Tuttas duas occurrenzas èn vegnidas visitadas da blera glieud e cun grond interess.

Regurdientschas restantas èn la marca postala speziala, che la Posta svizra ha edì per l'onn da giubileum, e plinavant ina publicaziun festiva da 144 paginas. 
 
Shop da giubileum
Il puzzle da giubileum (100 u 1000 tocs), la publicaziun festiva ed ulteriurs artitgels pon vegnir empustads, fin che la provisiun tanscha, en il shop da giubileum sut www.cadastre.ch/2012. La marca postala speziala "100 onns mesiraziun uffiziala" po vegnir cumprada tar la Posta svizra u online sut www.post.ch/philashop (Ausgabe vom 9.5.2012 > 100 Jahre Amtliche Vermessung). 
 
La mesiraziun uffiziala en Svizra
Dapi l'onn 1912 è la mesiraziun uffiziala in pilaster principal dal sistem giuridic svizzer. Ella documentescha, a tgi ch'in bain immobigliar appartegna, definescha ils cunfins, ils lieus dals edifizis, ma er ils curs dals auals u ils urs dals guauds. Cun la protecziun da la proprietad funsila furnescha ella ina contribuziun impurtanta per la segirezza giuridica e per il bainstar en noss pajais. Purtada vegn la mesiraziun uffiziala da la confederaziun, dals chantuns e da las vischnancas. Realisada vegn ella da persunas privatas e per part er d'uffizis da mesiraziun communals. Per ulteriuras infurmaziuns visitai per plaschair www.cadastre.ch. 

L'organisaziun dal project
Il giubileum da 100 onns è vegnì purtà dals suandants partenaris: direcziun federala da mesiraziun (uffizi federal da topografia swisstopo), conferenza dals uffizis chantunals da mesiraziun CUCM, inschigners geometers svizzers IGS, societad svizra da geomatica da gestiun dal territori geosuisse, gruppa professiunala dals inschigners da geomatica Svizra Geo+Ing (avant gruppa professiunala da mesiraziun e geoinfurmaziun FVG e groupement des ingénieurs en géomatique GIG) e professiunists da geomatica Svizra (PGS). 

Maletgs per duvrar libramain
www.cadastre.ch/2012 > Für die Medien 


Infurmaziuns:
Franco Bontognali, manader da la partiziun mesiraziun, uffizi d'agricultura e da geoinfurmaziun dal Grischun, tel. 081 257 24 61, e-mail: franco.bontognali@alg.gr.ch  
 

Gremi: uffizi d'agricultura e da geoinfurmaziun dal Grischun
Funtauna: rg uffizi d'agricultura e da geoinfurmaziun dal Grischun