La regenza ha deliberà las contribuziuns 2012 en il rom da la gulivaziun da finanzas intercommunala. Ultra da quai è ella sa fatschentada cun differentas fatschentas e cun divers projects da vischnancas e da regiuns. 

Contribuziuns da gulivaziun e da promoziuns da fusiuns da circa 55 milliuns francs
Per contribuziuns da gulivaziun a vischnancas finanzialmain deblas e per contribuziuns per promover fusiuns da vischnancas en il Grischun vegnan duvrads quest onn circa 55 milliuns francs. La regenza ha deliberà las contribuziuns da la gulivaziun da finanzas 2012. Quellas sa repartan sco suonda:
- Per la gulivaziun da la forza fiscala vegnan pajadas contribuziuns da stgars 19 milliuns francs. Quest import vegn pajà a tut en tut 69 vischnancas.
- Als custs da las ovras publicas vegnan pajads circa 4,8 milliuns francs.
- En il rom da la gulivaziun dal basegn spezial vegnan pajads totalmain 2,7 milliuns francs.
- A contribuziuns per promover fusiuns da vischnancas sco er a contribuziuns als custs da studis da fusiun vegnan pajads tut en tut circa 28,2 milliuns francs. 

Chareschia negativa – nagina gulivaziun
Ils salaris fundamentals da las collavuraturas e dals collavuraturs da l'administraziun chantunala e da las persunas d'instrucziun da las scolas popularas na sa midan betg per l'onn 2013. La basa da la decisiun da conceder in'eventuala cumpensaziun da la chareschia è per la regenza mintgamai il stadi da l'index naziunal dals pretschs da consum (numnà qua sutvart index) la fin da november. Per la fin da november 2012 mussava l'index 103,2 puncts (basa december 2005 = 100 puncts). La differenza tar il stadi da l'index da la fin da november 2010 da 104,2 puncts importa minus 1,0 puncts. La regenza ha decidì da betg gulivar la chareschia negativa. 

Trais projects chantunals per ils 3 da mars 2013
La regenza ha fixà ils projects chantunals da votaziun per ils 3 da mars 2013. Dumengia, ils 3 da mars 2013, vegni votà davart las suandantas fatschentas chantunalas:
- XXIV. gieus olimpics d'enviern en il Grischun 2022;
- iniziativa chantunala dal pievel "Per elecziuns gistas" (iniziativa da proporz 2014);
- revisiun parziala da la constituziun chantunala (art. 16 cifra 6 CC, aboliziun dal referendum da las autoritads).
Plinavant ha la regenza prendì enconuschientscha dal fatg ch'ils suandants projects federals vegnan suttamess il medem di a la votaziun dal pievel:
- conclus federal dals 15 da zercladur 2012 davart la politica da famiglia;
- iniziativa dal pievel dals 26 da favrer 2008 "cunter remuneraziuns abusivas";
- midada dals 15 da zercladur 2012 da la lescha davart la planisaziun dal territori. 
 

Da vischnancas e da regiuns

• Zuoz: La revisiun parziala da la planisaziun locala, concludida da la vischnanca da Zuoz ils 11 da november 2009, vegn approvada. L'intent da la revisiun parziala è da reglar il tractament futur da las aclas tradiziunalas che sa chattan sur il vitg e ch'èn sparpagliadas sin ina surfatscha da var 200 hectaras. Fin a duas aclas che vegnan anc duvradas da l'agricultura vegnan quests edifizis duvrads per far vacanzas. Cun la nova planisaziun d'utilisaziun duai vegnir garantì che las aclas èn protegidas cunter midadas architectonicas che na sa cunfan betg cun il lieu e cun la tradiziun sco er cunter la decadenza. La planisaziun locala vegn approvada da la regenza senza il minim pregiudizi per in'eventuala midada totala d'intent da las aclas.
• Arosa: La revisiun parziala da la planisaziun locala, concludida da la vischnanca dad Arosa ils 11 da mars 2012, vegn approvada. Cun la revisiun parziala vegn engrondida la zona per deponias "Bruchhalde". Il volumen da la deponia vegn augmentà per var 207 000 a totalmain 557 000 meters cubic.
• Saas: La revisiun parziala da la planisaziun locala, concludida da la vischnanca da Saas ils 17 da favrer 2012, vegn approvada. L'intent da la revisiun parziala è quel da realisar ulteriuras plazzas da parcar privatas.
• Soazza: La lescha da construcziun, concludida da la vischnanca da Soazza ils 15 da mars 2012, vegn approvada.
• Vaz: A la vischnanca da Vaz conceda la confederaziun in credit en il rom da la nova politica regiunala (NPR) da 405 000 francs per il project "Engrondiment dal traject da bike al Corn cotschen", premess che la finanziaziun totala saja reglada Sco prestaziun d'equivalenza tar il credit da NPR vegn garantida ina contribuziun chantunala da maximalmain 68 177 francs. Resalvada resta l'approvaziun dals credits necessaris tras il cussegl grond. Il "engrondiment dal traject da bike al Corn cotschen" cumpiglia la construcziun da trajects da descensiun cun trais differents grads da difficultad tranter la staziun da mez Scharmoin e la staziun da val Canols.
• Domat: Il project "Tegia da vaut - Waldhütte Domat/Ems" vegn approvà. L'edifizi simpel da lain ch'è planisà en il territori "Plong Vaschnaus" serva en emprima lingia sco "stanza da scola en il guaud". La patruna da construcziun è la vischnanca burgaisa da Domat. Quella surpiglia er la finanziaziun.
• Buseno: A la Calancasca SA, Lostallo, vegn concedida – cun pretensiuns – la permissiun per ina derschentada primara da la batschida Molina, vischnanca da Buseno, il pli baud per la primavaira 2013. Ulteriuras derschentadas supplementaras na vegnan betg permessas per il mument. La batschida Molina è vegnida messa en funcziun l'onn 1951 ed accumulescha l'affluent da la Calancasca en in intschess da 134 kilometers quadrat. Dapi l'ultima derschentada l'onn 1996 è la batschida enterrada fermamain.
• Luzein: Al consorzi per aua persa dal Partenz central vegn garantida ina contribuziun da maximalmain 37 703 francs als custs supplementars da la 2. etappa per renovar la serenera Dalvazza.
• Maiavilla: La constituziun da la citad da Maiavilla dals 13 da november 2012 vegn approvada.
• Puschlav: La constituziun da la vischnanca da Puschlav dals 25 da november 2012 vegn approvada.

Contribuziuns chantunalas a differentas instituziuns

• Gruppa da l'Arena alva: En il rom da la nova politica regiunala (NPR) vegn concedida al project "Tschima – Kulturelle Intervention am Berg" da la Gruppa da l'Arena alva ina contribuziun da totalmain 500 000 francs (confederaziun e chantun). Resalvada resta l'approvaziun dals credits necessaris tras il cussegl grond. La finamira dal project è quella d'attrair novs giasts per la destinaziun Flem Laax cun in product turistic ch'è independent dal sport da naiv. Previs èsi da posiziunar la destinaziun en ils secturs art, design ed architectura cun carisma internaziunal.
• Agentura da novitads rumantscha: La regenza ha approvà ina cunvegna da prestaziun tranter il chantun e l'Agentura da novitads rumantscha (ANR) per la perioda da legislatura 2013 fin 2016. La cunvegna cumpiglia ina purschida da basa da contribuziuns schurnalisticas en ils idioms rumantschs ed en rumantsch grischun sco sustegn da tut las medias stampadas ed electronicas. Per questa prestaziun survegn la ANR ina contribuziun chantunala annuala da 445 000 francs sco er ina contribuziun federala annuala da 736 000 francs. La promoziun da linguas da la confederaziun per ils onns 2012 fin 2015 è vegnida reglada per l'emprima giada en ina cunvegna da prestaziun cun il Grischun.
• Pro Grigioni italiano: La regenza ha approvà ina cunvegna da prestaziun tranter il chantun e la Pro Grigioni italiano per la perioda da legislatura 2013 fin 2016. La cunvegna cumpiglia projects, publicaziuns e cussegliaziuns. Per questa prestaziun survegn la Pro Grigioni Italiano ina contribuziun chantunala annuala da 170 000 francs sco er ina contribuziun federala annuala dad 800 000 francs. La promoziun da linguas da la confederaziun per ils onns 2012 fin 2015 è vegnida reglada per l'emprima giada en ina cunvegna da prestaziun cun il Grischun.
• Federaziuns da sport ed organisaziuns da l'associaziun grischuna da sport: Tut en tut 44 federaziuns da sport ed organisaziuns che fan part da l'associaziun grischuna da sport survegnan l'onn 2012 contribuziuns pauschalas or dal fond da sport d'in import total d'in milliun francs.
• Club da tennis Vaz sut: Al club da tennis Vaz sut vegn concedida ina contribuziun da maximalmain 37 600 francs or dal fond da sport per remplazzar in tarpun da tschispet artifizial.

Projects da vias
La regenza ha approvà 205 000 francs per lavurs da construcziun sin il suandant traject:
- H27, via d'Engiadina: lavurs d'impressari e da cuvrida, correcziun dal traject Giarsun – Ardez vest


Gremi: regenza
Funtauna: rg chanzlia chantunala dal Grischun