Cuntegn da la pagina

Ina immobiglia a Laax duai servir sco nov center d'asil

  • Erste Mitteilung
  • Neuen Beitrag einfügen
Damai ch'il dumber da requirentas e da requirents d'asil ch'èn vegnids attribuids da nov al chantun Grischun è s'augmentà fermamain er l'onn current, prenda la regenza mesiras per garantir la collocaziun da las requirentas e dals requirents d'asil. Il chantun prenda perquai en locaziun ina immobiglia a Laax sco center da transit.

Il dumber da novas dumondas d'asil en Svizra è anc adina grond. La confederaziun ha attribuì al chantun Grischun l'onn 2010 totalmain 336 e l'onn 2011 573 requirentas e requirents d'asil. L'onn current è il dumber da persunas ch'il chantun sto collocar creschì gia fin la fin da november sin 686. Damai che l'alloschi collectiv a Tavau Laret che serviva sco alloschi da reserva ha stuì vegnir mess en funcziun la stad da quest onn pervia dal grond dumber permanent da persunas attribuidas, vegn prendì en locaziun a pli lunga vista a partir dal 1. da fanadur 2013 l'hotel Rustico a Laax. Quai per garantir la capacitad da collocaziun.

Qua tras duain vegnir dumagnadas variaziuns extraordinarias dal dumber da requirentas e da requirents d'asil che vegnan attribuids al chantun. Quai per evitar collocaziuns d'urgenza en implants da protecziun civila en las vischnancas. L'alloschi vegn occupà pir e mo uschè ditg, sco quai che tut ils alloschis collectivs en il chantun èn occupads cumplettamain pervia da l'eventual grond augment da novas dumondas d'asil. 


Infurmaziuns:
- cusseglier guvernativ Christian Rathgeb, schef dal departament da giustia, segirezza e sanadad, tel. 081 257 25 01
- Marcel Suter, manader da l'uffizi da migraziun e da dretg civil, tel. 081 257 25 21


Gremi: regenza
Funtauna: rg chanzlia chantunala dal Grischun
Neuer Artikel