Cuntegn da la pagina

L'uffizi per il traffic sin via dal chantun Grischun introducescha la facturaziun electronica

  • Erste Mitteilung
  • Neuen Beitrag einfügen
Sco emprim post da servetsch da l'administraziun chantunala ha l'uffizi per il traffic sin via dal chantun Grischun introducì la facturaziun electronica.

La clientella da l'uffizi per il traffic sin via dal Grischun po retschaiver da nov ses quints directamain per e-banking, als examinar ed als pajar cun in clic cun la mieur. Per pudair profitar da questa moda da pajar quints cumadaivla e segira, ston las persunas che retschaivan ils quints activar – en il portal d'e-banking da lur institut finanziar – il servetsch sut il menu "quint electronic" ed alura s'annunziar per la facturaziun electronica sur la glista dals emittents da quints tar il "uffizi per il traffic sin via dal Grischun". Il proxim quint vegn alura gia transmess sin via electronica en l'e-banking, uschia ch'i crodan davent l'endataziun da las datas da pajament en l'e-banking e l'archivaziun dals quints sin palpiri. La controlla cumpletta dal quint è adina garantida. Sch'i dat discordanzas, po il quint electronic vegnir refusà. Cun il nov servetsch fa l'administraziun chantunala in ulteriur pass en direcziun d'in e-government favuraivel a las burgaisas ed als burgais. 

Passa 200 000 quints per onn
L'uffizi per il traffic sin via dal chantun Grischun trametta mintga onn passa 200 000 quints a la clientella. Actualmain èn vegnids tramess sin via postala circa 93 000 quints da la taglia da traffic per l'onn 2013. Durant l'onn resultan facturaziuns per exempel en connex cun midar vehichels, cun retrair novs numers d'immatriculaziun, cun emetter permiss da manischar u cun controllas periodicas posteriuras. La facturaziun electronica permetta pia er da spargnar bler palpiri e gida a proteger l'ambient. 
 

Infurmaziuns:
Richard Peretti, substitut dal manader da l'uffizi per il traffic sin via dal chantun Grischun, tel. 081 257 80 10


Gremi: uffizi per il traffic sin via dal chantun Grischun
Funtauna: rg uffizi per il traffic sin via dal chantun Grischun
Neuer Artikel