Navigation

Inhaltsbereich

  • Erste Mitteilung
  • Neuen Beitrag einfügen
Il nov dretg da la protecziun d'uffants e da creschids entra en vigur il 1. da schaner 2013. Per quest termin metta la regenza grischuna en vigur ils relaschs executivs chantunals. La novaziun la pli impurtanta en quest connex è la furmaziun da 5 autoritads chantunalas per la protecziun d'uffants e da creschids che remplazzan las autoritads tutelaras actualas. Suenter bunamain 1 onn da preparaziun e da furmaziun èn las novas autoritads ussa prontas per cumenzar cun lur lavur. 

Il 1. da schaner 2013 entra en vigur il nov dretg da la protecziun d'uffants e da creschids da la confederaziun. Quest nov dretg tegna quint da las midadas socialas, economicas e giuridicas, concepescha las mesiras uffizialas anc pli fitg tenor il cas singul concret e promova il dretg d'autodeterminaziun e la solidaritad entaifer la famiglia. Il punct central ord vista organisatorica è la furmaziun d'autoritads spezialisadas interdisciplinaras che duain dumagnar meglier las pretensiuns creschentas. Qua tras vul la confederaziun professiunalisar ils fatgs tutelars. Da las novas structuras profitescha quasi l'entira populaziun. Pervia dal svilup demografic daventan las autoritads per la protecziun d'uffants e da creschids numnadamain adina pli impurtantas, ed adina dapli persunas vegnan en contact cun ellas. 

Furmaziun da 5 autoritads chantunalas per la protecziun d'uffants e da creschids (APUC)
Pervia da las prescripziuns stringentas dal dretg federal sto vegnir furmada ina nova organisaziun administrativa en il chantun Grischun. En la sessiun da december 2011 ha il cussegl grond concludì cun ina revisiun parziala da la lescha introductiva tar il cudesch civil svizzer da furmar 5 autoritads autonomas cun cleras cumpetenzas territorialas. Mintga autoritad per la protecziun d'uffants e da creschids (APUC) sa cumpona d'ina manadra u d'in manader en uffizi cumplain sco er d'almain 2 ulteriurs commembers da l'autoritad en uffizi cumplain u principal che han las enconuschientschas spezialisadas necessarias en las disciplinas centralas "dretg", "lavur sociala" e "pedagogia/psicologia". Las APUC vegnan mintgamai sustegnidas d'in secretariat. Quel ademplescha principalmain incumbensas en ils secturs "scleriments giuridics e dals fatgs", "revisurat" ed "administraziun".
Da la primavaira fin la stad 2012 ha la regenza grischuna tschernì la manadra ed ils 4 manaders da las APUC sco er ils ulteriurs commembers da las autoritads. Fin l'atun 2012 han er pudì vegnir occupadas las plazzas en ils servetschs da sustegn. En connex cun l'occupaziun da las plazzas èsi vegnì guardà d'engaschar sche pussaivel collavuraturas e collavuraturs vertents da las autoritads tutelaras. 

In team da project ha accumpagnà las lavurs per las APUC
Dapi il relasch da la legislaziun executiva chantunala avant 1 onn èn stadas necessarias lavurs cumplessivas da furmaziun per che las 5 APUC Engiadina/vals dal sid (a Samedan e Scuol), Grischun central/Moesa (a Tusaun e Roveredo), Grischun dal nord (a Cuira), Partenz/Tavau (a Tavau) e Surselva (a Glion) possian cumenzar il 1. da schaner 2013 cun lur activitads operativas. Questas lavurs e la coordinaziun ha surpiglià in team da project ch'è vegnì manà da cusseglier guvernativ Christian Rathgeb. Dal team da project han fatg part ultra da la manadra e dals manaders designads da las APUC tranter auter er represchentants dals uffizis interdisciplinars da l'administraziun chantunala e dal departament da giustia. Il team è vegnì sustegnì tras la firma PersPec ch'è medemamain incaricada en il chantun Turitg cun la furmaziun da singulas autoritads per la protecziun d'uffants e da creschids.
Tras il transferiment da las incumbensas dals circuls al chantun surpiglia il chantun en l'avegnir ils custs da las autoritads per la protecziun d'uffants e da creschids. Cunquai che la finanziaziun da las autoritads tutelaras croda davent, vegnan las vischnancas distgargiadas tut en tut per var 2 milliuns francs per onn. 

Curatellas professiunalas sco incumbensa regiunala
Pervia da la restructuraziun sin plaun administrativ sto l'organisaziun da las curatellas professiunalas (fin ussa avugadias uffizialas) medemamain vegnir examinada, cumbain ch'i na resulta betg in basegn d'agir direct tras il dretg federal. Il cussegl grond ha concludì da designar la gestiun da las curatellas professiunalas sco incumbensa regiunala e betg pli sco incumbensa cirquitala. Qua tras tegna el quint da la refurma dal territori, tenor la quala ils circuls na duain survegnir naginas incumbensas pli. Cun quest conclus vegnan las curatellas professiunalas finanziadas sco fin ussa tras las vischnancas. Grazia ad ina regulaziun transitorica pon las instituziuns ch'èn responsablas fin ussa manar las curatellas professiunalas fin la fin da l'onn 2014. Quai permetta che la reordinaziun dal dretg da la protecziun d'uffants e da creschids vegnia coordinada en moda optimala cun la refurma dal territori. 
 
Ulteriuras infurmaziuns sco er tut ils lieus e las adressas da las 5 autoritads per la protecziun d'uffants e da creschids dal chantun Grischun chattais Vus sut www.kesb.gr.ch.  


Remartga:
Davart quest tema stat a disposiziun in video sut www.gr.ch
 

Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01


Gremi: regenza
Funtauna: rg chanzlia chantunala dal Grischun
Neuer Artikel