En ils bancs da scola dal center da furmaziun e cussegliaziun agricula Plantahof a Landquart na sesan durant l'emna tradiziunala da geniturs betg las scolaras ed ils scolars, mabain lur geniturs. Persuenter prendan las emprendistas ed ils emprendists dal terz onn d'emprendissadi durant in'emna il moni en maun sin il manaschi puril dals geniturs.

L'ultima contribuziun da video da la chanzlia chantunala dal Grischun è deditgada ad ina famiglia durant l'emna actuala da geniturs al Plantahof. Nus accumpagnain la famiglia e vesain co che il figl ed ils geniturs dumognan la nova repartiziun da las incumbensas, nua ch'els èn dumandads e tge ch'els emprendan durant l'emna da barat. Ils geniturs pernotteschan er en l'internat dal Plantahof. Durant quest temp pon els rinfrestgar lur savida professiunala ed han occasiun da sa barattar cun autras practicistas e cun auters practicists che han experientscha. Per las emprendistas ed ils emprendists èsi savens l'emprima giada ch'ellas ed els èn responsabels uschè ditg sulets per il manaschi puril dals geniturs.
L'emna da geniturs è ina tradiziun al Plantahof a Landquart e vegn stimada d'omaduas generaziuns. Quest onn vegnan barattadas las rollas durant il temp dals 28 da schaner fin il 1. da favrer. 
 
Remartga:
Il video stat a disposiziun sut www.gr.ch. 
 

Infurmaziuns:
Renato Mengelt, magister spezialisà per economia da manaschi al Plantahof,
tel. 081 257 60 35, e-mail: renato.mengelt@plantahof.gr.ch  
 

Gremi: center da furmaziun e cussegliaziun agricula Plantahof
Funtauna: rg center da furmaziun e cussegliaziun agricula Plantahof