Fin la proxima dumengia, ils 10 da favrer 2013, è il chantun Grischun preschents cun in'exposiziun speziala a la messa da vacanzas a Son Gagl. Sur ina preschentaziun dals parcs grischuns d'impurtanza naziunala duai il tema da la persistenza ed dal turissem persistent vegnir intermedià e rendì vivent.

Il concept per il project da messa ha creà il post spezialisà per turissem e svilup persistent, Center da Capricorns, Vargistagn. En il center da la preschentaziun stattan ils parcs ed ils projects da parc grischuns. I vegnan mussads exponats ch'ins pudeva er vesair a la messa NATUR 2012 a Basilea. Grazia ad in nov panorama interactiv dal parc natiral regiunal Beverin vegn il viadi d'exploraziun virtual dentant anc pli interessant per las visitadras ed ils visitaders . Ultra da quai vegnan preschentadas parts dal center d'infurmaziun futur da l'arena tectonica Sardona che duai vegnir installà sin il pass dal Cunclas en la vischnanca da Tumein.

La preschentaziun a la messa da vacanzas a Son Gagl sa concentrescha sin ils dus plauns cumpetenza e promoziun. Sin il plaun da la cumpetenza duain vegnir intermediadas infurmaziuns expressivas tras il sistem d'infurmaziun da parc ch'è vegnì sviluppà da nov, tras il nov reliev interactiv dal parc natiral Beverin e tras in'assistenza activa e cumpetenta da visitadras e visitaders. Sin il plaun da la promoziun duain las visitadras ed ils visitaders vegnir rendids attents als parcs tras ina preschentaziun innovativa e simpatica ed animads da visitar quels. 
 
Remartga:
Davart quest tema stat a disposiziun in video sut www.gr.ch. 
 

Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient