La regenza grischuna ha lantschà in nov program per la prevenziun d'alcohol. Plinavant ha ella approvà il project da l'ovra electrica Russein. Ultra da quai ha la regenza concludì che vischnancas cun centers d'asil vegnan indemnisadas en moda pauschala per eventualas expensas supplementaras. 

Il chantun ha lantschà in nov program per la prevenziun d'alcohol
Il chantun rinforza ses engaschament en il cumbat cunter las consequenzas d'in consum d'alcohol smesirà. La regenza ha approvà in "program grischun d'alcohol" (PGA) che dura 4 onns e ch'è vegnì elavurà da l'uffizi dal servetsch social e da l'uffizi da sanadad. Il program s'orientescha tenor las directivas d'in program naziunal da la confederaziun e prevesa differentas activitads da l'onn 2013 fin l'onn 2016. Latiers tutgan la prevenziun d'alcohol entaifer ed ordaifer las scolas, l'optimaziun da las purschidas da tractament per persunas cun problems d'alcohol, agids efficazis per uffants e giuvenils en famiglias che pateschan sut l'alcohol, il rinforzament da la protecziun da la giuventetgna e la lavur da campagnas. Il program custa circa 1,4 milliuns francs. Per la realisaziun vegn creada tar l'uffizi da sanadad ina plazza temporara da manadra u da manader da program (80 pertschient).
La reducziun da donns che resultan da l'alcohol tutga oz tar las sfidas las pli impurtantas da la societad. Ils donns che vegnan chaschunads tras il consum abusiv d'alcohol pertutgan numnadamain betg mo il singul individi. Els engrevgeschan enormamain las famiglias, ils conturns socials ed en spezial er ils conturns professiunals sco er la societad en general. Tras il nov program fixescha la regenza grischuna ina strategia a lunga vista per impedir problems che resultan da l'alcohol.
Davart quest tema stat a disposiziun in video sut www.gr.ch.

L'ovra electrica Russein po vegnir engrondida
La regenza ha approvà il project per l'engrondiment da l'ovra electrica Russein, uschia che quest project po vegnir realisà. Gia il cumenzament da l'onn 2012 ha la regenza approvà la concessiun dal dretg da las auas e la cunvegna davart la renunzia da las vischnancas concedentas al return dals implants (communicaziun da la regenza dals 26 da schaner 2012).
Il consorzi da project Russein – che sa cumpona da l'Axpo Hydro Surselva sco er da las vischnancas da staziunament Mustér e Sumvitg – vul augmentar la prestaziun da l'ovra electrica a circa 24 megawatts. I vegn quintà cun ina producziun annuala media da 64 uras da gigawatt. Il mir da fermada a Barcuns vegn auzà per 5 meters. Il conduct da pressiun existent vegn remplazzà tras in nov conduct da pressiun sutterran, ed en l'edifizi da la centrala vegnan installadas duas novas gruppas da maschinas. Da nov vegn l'aua restituida là, nua che l'aual da Russein sbucca en il Rain anteriur. Ils custs d'investiziun importan circa 70 milliuns francs. Sco mesiras da cumpensaziun per l'intervenziun en la natira èsi previs da prender mesiras da revitalisaziun en las zonas umidas a Fontanivas, da spustar ina loipa ed ina via da velos sco er da revitalisar l'aual dal vitg da Surrein.

Il chantun surpiglia las expensas supplementaras da vischnancas cun centers d'asil
A las vischnancas grischunas cun centers d'asil indemnisescha il chantun eventualas expensas supplementaras. La regenza ha decidì da pajar a las quatter vischnancas da staziunament – Cazas, Tavau, Schluein e Cuira – ina indemnisaziun annuala per las expensas supplementaras che pon resultar tras il manaschi d'in center d'asil. Cazas, Tavau, Schluein e Cuira survegnan ensemen ina pauschala da 100 000 francs per onn or dal quint d'asil. Las quatter vischnancas repartan questa summa tranter ellas. En cas ch'il chantun avra ulteriurs centers d'asil, vegnan er questas vischnancas da staziunament indemnisadas analogamain, sch'ellas pretendan quai.
L'indemnisaziun per cuvrir eventualas expensas supplementaras en connex cun ils alloschis collectivs dals fatgs d'asil vegn pajada a las vischnancas mo, fin che la refurma da la gulivaziun da finanzas en il chantun Grischun entra en vigur. Tras la realisaziun da la refurma da la gulivaziun da finanzas vegni tegnì quint dals interess da las vischnancas cun centers d'asil, e quai en il rom da la gulivaziun da las resursas sco er da la gulivaziun da las grevezzas geografic-topograficas. Las expensas supplementaras che vegnan numnadas da las vischnancas pervia dal manaschi da centers d'asil resultan en l'administraziun, tras pajaments a corporaziuns da vischnancas, tar il servetsch social e tar l'integraziun en il mund da lavur sco er tar la segirezza generala. 

Elavuraziun d'ina nova basa legala per l'archivaziun
Il chantun Grischun duai survegnir ina nova lescha d'archivaziun. La regenza ha incumbensà il departament d'educaziun, cultura e protecziun da l'ambient d'elavurar in sboz d'ina lescha correspundenta. Las ordinaziuns vertentas davart l'archiv dal stadi sco er davart ils archivs communals, cirquitals e districtuals da l'onn 1988 na cuntentan oz betg pli sco basas per l'archivaziun chantunala. En spezial na resguardan ellas betg la legislaziun davart la segirezza da las infurmaziuns e davart la protecziun da datas che s'etablida dapi lura.
Uschia exista per exempel in basegn d'adattaziun tar la fixaziun da termins per documents ed effectivs protegids en ils archivs. Medemamain duain las novas prescripziuns resguardar ils purtaders d'infurmaziuns multifars d'ozendi. Plinavant ston er disposiziuns davart la gestiun d'actas vegnir integradas en la lescha, perquai che l'archivaziun da documents cumenza gia en questa fasa. La basa legala duai valair per tut las corporaziuns publicas en il chantun. 

Approvà la scola da talents a Champfèr
La regenza ha dà la permissiun da manar classas da talents a la scola communala da San Murezzan tenor la nova lescha da scola. Il concept inoltrà da la scola communala prevesa ina scola da talents sin il stgalim superiur a Champfèr per uffants cun talents sportivs u artistics. Scolaras e scolars dal stgalim secundar I da l'Engiadin'ota duain survegnir la pussaivladad da cumbinar scola e sport resp. scola e musica en in rom sumegliant sco en ina scola media da sport u da musica. Per la 7. ed 8. classa duai vegnir cumenzà cun las classas da talents il proxim onn da scola 2013/2014. 
 

Da vischnancas e da regiuns

• Cuira: Il project da la citad da Cuira per ina senda e via da velos tranter la Giacomettistrasse ed il Schellenbergweg vegn approvà. Als custs per construir la via da velos vegn concedida ina contribuziun chantunala da 131 625 francs.
• Claustra-Serneus: La revisiun parziala da la planisaziun locala, concludida da la vischnanca da Claustra-Serneus ils 25 da november 2012, vegn approvada. La revisiun parziala furma principalmain la basa da la planisaziun d'utilisaziun per in nov local da pumpiers en il territori "Doggiloch".
• Arosa: Il plan da perimeter dal territori da bovas "Maiasäss" e "Tarnatel" en la fracziun da Peist vegn approvà.
• Cunter, Riom-Parsonz, Salouf e Savognin: Ils statuts da la nova corporaziun da vischnancas "Revier forestal Sotgôt" vegnan approvads.
• Grono: La revisiun parziala da la constituziun communala da la vischnanca da Grono dals 25 da november 2012 vegn approvada. Midà han ins las disposiziuns concernent il cussegl da scola.
• Grüsch e Seewis: La revisiun parziala dals statuts dal "Consorzi da scola Grüsch/Seewis" vegn approvada.
• Casti-Vargistagn: Cun resalva d'ina contribuziun federala vegn garantida ina contribuziun chantunala da maximalmain 39 240 francs als custs supplementars da la 5. etappa da la meglieraziun generala da Casti-Vargistagn. 

 
Contribuziuns chantunalas a differentas instituziuns

• Arosa turissem: Cun resalva che la finanziaziun totala saja reglada e ch'ina permissiun da construcziun legalmain valaivla saja avant maun, vegn concedì a l'uniun "Arosa turissem" in emprest da 400 000 francs en il rom da la nova politica regiunala da la confederaziun (NPR) per il project "Sommererlebnisse Mittelstation Weisshornbahn". Sco prestaziun d'equivalenza a l'emprest da la NPR vegn garantida ina contribuziun chantunala da 67 336 francs. Il project duai gidar a sviluppar vinavant la purschida "all inclusive" ad Arosa. Las investiziuns en l'infrastructura en il territori da la staziun da mez da la pendiculara dal Weisshorn duain stgaffir novas aventuras da muntogna per famiglias cun uffants sco er per giuvenils.

Projects da vias
La regenza ha approvà var 12,5 milliuns francs per lavurs da construcziun sin ils suandants trajects:
- via d'Engiadina: lavurs d'impressari, punt a spunda da Magnacun e punt da Magnacun, en il rom da la corpus da la via Giarsun – Ardez vest
- via dal Güglia: lavurs d'impressari e da cuvrida, corpus da la via, Lantsch, entaifer il vitg
- via taliana, Pian San Giacomo – Soazza: lavurs d'impressari, reparaziun da la punt dal Riale d'Anzone
- via dal Meir: lavurs d'impressari, reparaziun da la punt pitschna da Solas 
 

Gremi: regenza
Funtauna: rg chanzlia chantunala dal Grischun