Zum Seiteninhalt

Emprim "snow day 4 kids" sco cumenzament per il maraton da passlung da l'Engiadina

  • Erste Mitteilung
  • Neuen Beitrag einfügen
320 uffants da la scola primara èn sa participads oz a San Murezzan a la premiera dal "snow day 4 kids". Da 5 chantuns eran arrivads las scolaras ed il scolars da 6 fin 12 onns cun lur persunas d'instrucziun, per passentar in di da moviment tut spezial. Cusseglier guvernativ Christian Rathgeb ed Ivo Damasko, president dal comité d'organisaziun dal maraton da passlung da l'Engiadina, han beneventà las classas da scola.

Nua che millis passlunghistas e passlunghists sa glischnan en 2 dis sur las loipas a chaschun dal maraton da passlung da l'Engiadina, han giudì oz 16 classas da scola da 5 chantuns – ch'eran vegnidas tratgas ora – in di da moviment allegher. En il "Dario Cologna Fun Parcours" è lura er stà il passlung en il center: Mintgamai 80 uffants da scola faschevan a medem temp sut instrucziun cumpetenta emprimas emprovas sin ils skis balluccants. Ma er tar il "Schlitten-Jöring", tar il sigl en lung en la naiv e tar las staffettas da bottas da naiv nunconvenziunalas valevi da rimnar puncts prezius – la finala spetgavan premis da classa attractivs.

Il percurs d'enviern nunusità pareva da far plaschair a tuts. E cun quai è la finamira cuntanschida: Il "snow day 4 kids" vul motivar uffants, er da sa mover avunda l'enviern. L'occurrenza è vegnida organisada dal comité d'organisaziun dal maraton da passlung da l'Engiadina, da Swiss-Ski, dal chantun Grischun en il rom da ses program "graubünden bewegt" sco er da "fit-4-future", il pli grond project per la promoziun dal moviment per uffants en Svizra.


Fotografia agiuntada:

cusseglier guvernativ Christian Rathgeb (a sanestra) e Ivo Damasko president dal comité d'organisaziun dal maraton da passlung da l'Engiadina cun uffants da la scola primara tar il "snow day 4 kids" che ha gì lieu oz a San Murezzan. 
 

Infurmaziuns:

Hanspeter Brigger, manader "graubünden bewegt", tel. 079 257 18 10, hanspeter.brigger@san.gr.ch 


Gremi: uffizi da sanadad dal Grischun
Funtauna: rg uffizi da sanadad dal Grischun 
Neuer Artikel