La regenza suttametta al cussegl grond ina missiva per contribuziuns a la renovaziun ed a la restauraziun dal chastè da l'uvestg a Cuira. Il project da construcziun duai vegnir sustegnì cun var 4 milliuns francs tras il maun public. 

Il chastè da l'uvestg a Cuira è in monument cultural d'impurtanza naziunala ed ina da las pli impurtantas construcziuns profanas en il chantun Grischun. Fundond sin in chastè da l'imperi roman tardiv è vegnì construì in chastè da l'uvestg en il temp medieval tempriv ed autmedieval che la finala è vegnì transfurmà e munì en il 17avel e 18avel tschientaner en il chastè dad oz. Dapi l'ultima renovaziun cumplessiva l'onn 1912 èn mo vegnidas fatgas pitschnas renovaziuns suenter ils onns 1960 e 1970. Per garantir la protecziun dal monument architectonic impurtant n'è ina renovaziun e restauraziun cumplessiva betg suspensibla. Las renovaziuns, las restauraziuns ed ils engrondiments planisads dal biro d'architectura Jüngling e Hagmann a Cuira servan per mantegnair la substanza a lunga vista e per mantegnair l'utilisaziun adequata dal monument architectonic e da ses equipament. La planisaziun e l'execuziun vegnan accumpagnadas tras la tgira da monuments ed il servetsch archeologic dal Grischun.

L'utilisaziun organisada da nov da tut las parts da l'edifizi dal chastè cumpiglia numerusas funcziuns: las abitaziuns per ils curriers da l'uvestg, il persunal ed ils giasts; ils biros e las localitads accessoricas dal manaschi da l'ordinariat da l'uvestg; las localitads dal retschaviment e da las sesidas; ils depots per la biblioteca, per ils archivs e per bains culturals movibels; il museum da tresor nov da la catedrala; la garascha sutterrana e la finala ils locals per la tecnica da chasa cumplettamain renovada. Impurtant per il project general era la concentraziun spaziala d'utilisaziuns che tutgan ensemen, medemamain l'avertura optimala da tut las parts da l'edifizi cun ils passadis, las stgalas ed ils lifts, quai cun uschè pitschnas intervenziuns sco pussaivel en la substanza da construcziun istorica. Tras il museum da tresor nov da la catedrala vegn rendida ina part dal chastè da l'uvestg accessibla al public. 

Cunvegna da program tranter la confederaziun ed il chantun
Ils custs totals dal project importan stgars 29 milliuns francs. Vi da quest project èn sa participads la confederaziun ed il chantun cun mintgamai 2 015 000 francs, tut en tut 4 030 000 francs. La confederaziun è s'obligada – cun la cunvegna da program tranter la confederaziun ed il chantun Grischun en il sectur protecziun da la patria e tgira da monuments per la perioda da program 2012 fin 2015 – da prestar ina contribuziun globala al chantun Grischun ed ha delegà a medem temp la cumpetenza da la garanzia da survegnir contribuziuns e la liquidaziun finanziala al chantun. Las contribuziuns da la confederaziun pon vegnir garantidas per las etappas fin 2015 cun la resalva che l'assamblea federala permetta transchas annualas. Contribuziuns federalas per las etappas da construcziun a partir da l'onn 2016 stattan cun la resalva ch'ina cunvegna da program nova reusseschi tranter la confederaziun ed il chantun en il sectur da la protecziun da la patria e da la tgira da monuments per la perioda da program 2016 fin 2019. La regenza exprima en quest connex sia intenziun, sch'ina tala cunvegna reusseschi, da duvrar ils meds finanzials confurm a la missiva er a favur dal chastè da l'uvestg.

La dumonda da participaziun vegn suttamessa al cussegl grond cun ina missiva da la regenza en la sessiun da zercladur 2013. La finanziaziun da l'import anc nunpajà da var 17,75 milliuns francs vegn fatga cun agid da donaziuns e contribuziuns d'instanzas da la baselgia e dal stadi, da fundaziuns, d'organisaziuns, da firmas e da persunas privatas sco er cun ulteriurs agens meds e cun chapitals ad emprest. 
 
 
Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01


Gremi: regenza
Funtauna: rg chanzlia chantunala dal Grischun