Ils 19 d'avrigl ha lieu l'event da "trampolin" GR 2013, in'occurrenza da carriera extraordinaria per studentas e students sco er per interpresas: Cun agid da lavuratoris decentrals che sa chattan tar las interpresas sezzas sco er cun agid da stans d'infurmaziun centrals augmentan las interpresas dal chantun Grischun tar las studentas e tar ils students lur reputaziun sco patrunas attractivas. Las studentas ed ils students che sa participeschan a l'event profiteschan d'infurmaziuns davart praticums, davart lavurs da bachelor u da master, davart programs per persunas en scolaziun sco er davart plazzas d'access. 

Cumbat per persunal spezialisà e da cader
Pervia da l'academisaziun actuala tar l'occupaziun da las plazzas sco er pervia da la midada demografica resulta tar las interpresas in cumbat pli e pli dir per persunal spezialisà e da cader cun las qualificaziuns necessarias. Da quest cumbat sto mintga interpresa s'occupar baud u tard. Tgi che ignorescha questa midada, vegn surpassà da la concurrenza.

Per quest motiv han l'uffizi per economia e turissem, l'uffizi per la furmaziun media-superiura sco er la scola auta da tecnica ed economia (SATE) a Cuira incumbensà gia per l'otgavla giada la together SA d'organisar l'event da "trampolin". Quest event, che vegn cofinanzià da la banca chantunala grischuna sco sponsura principala, pussibilitescha a las interpresas da sa francar sco patrunas attractivas en ils chaus da las studentas e dals students sco er da las absolventas e dals absolvents da differents studis da scolas autas professiunalas ed universitaras.

Las suandantas 11 interpresas sa participeschan a l'event da "trampolin" GR 2013:

• Academia Raetica
• Ems-Chemie SA
• Georg Fischer Kunststoffarmaturen SA
• Banca chantunala grischuna
• Gritec SA
• Hamilton Medical SA
• Inventx SA
• Trumpf Grüsch SA
• VZ VermögensZentrum SA
• Wenzel Metromec SA
• Wittenstein SA

Contacts pli profunds tras la lavur cuminaivla
En il center dals events da "trampolin" stat la lavur cuminaivla en lavuratoris, nua che las interpresas preschentan ina sfida actuala da lur lavur quotidiana ad ina gruppa da studentas e students. Ensemen vegnan lura elavuradas propostas da soluziun innovativas. Las studentas ed ils students pon uschia dar in sguard unic davos las culissas d'ina interpresa. Pli tard, als stans d'infurmaziun, pon las interpresas mussar en in'atmosfera lucca lur perspectivas da carriera per las studentas ed ils students e stabilir contacts persunals e duraivels cun lavurantas e lavurants pussaivels. 

Ins po anc s'annunziar
L'event da "trampolin" GR è in da totalmain set events da "trampolin" en Svizra ed ha lieu venderdi, ils 19 d'avrigl 2013 en il B12 caffè & bar a Cuira. Studentas e students interessads pon anc s'annunziar per l'event da "trampolin" fin dumengia, ils 7 d'avrigl 2013. Ulteriuras infurmaziuns sco er las pussaivladads d'annunzia chattan ins sin www.sprungbrett-events.ch. 
 
 
Infurmaziuns:
Paolo Giorgetta, svilup da l'industria locala, uffizi per economia e turissem, tel. 081 257 23 75


Gremi: uffizi per economia e turissem
Funtauna: rg uffizi per economia e turissem