La nova exposiziun speziala dal museum retic a Cuira sa fatschenta cun l'istorgia grischuna da la munaida e dals daners. L'exposiziun dura dals 19 d'avrigl fin il 1. da settember 2013. Ina impressiun da l'exposiziun dat in nov video da la chanzlia chantunala dal Grischun sut www.gr.ch.

Tge munaida sclingiva en las bursas dals Grischuns? Tge pudevan ins cumprar cun quai? Tgi batteva questa munaida? Co vegniva ella producida?
L'exposiziun speziala mussa l'istorgia cumplexa da la munaida e dals daners en il Grischun. Numerusas munaidas dal Grischun e numerus buls en reliev or da la collecziun dal museum retic sco er funtaunas en scrit illustreschan l'activitad dals 10 battiders da munaida. Er la munaidaria da Cuira che n'è strusch vegnida perscrutada enfin ussa tradescha sias secretezzas. Ina gronda quantitad da chats mussa tge munaidas che sa chattavan en ils scrigns ed en las bursas da la populaziun grischuna. Ultra da quai s'occupa l'exposiziun da la circulaziun dals daners, dals decrets e da las refurmas da la munaida sco er dals pretschs e dals salaris e natiralmain er dals cumplots dubius areguard munaida nauscha e faussa. Battend cun agen maun in rap da Cuira sa cumplettescha l'invista en quest toc fascinant da l'istorgia dal mintgadi per las visitadras e per ils visitaders.

Il program accumpagnant tar l'exposiziun speziala cuntegna ina vasta paletta d'occurrenzas davart munaida e daners: da guids publics, d'ateliers da munaida per uffants e d'in lavuratori da batter munaida fin ad in'excursiun tras l'istorgia da munaida da Cuira.

La vernissascha publica da l'exposiziun ha lieu oz, gievgia, ils 18 d'avrigl 2013, a las 18.00. 
 
Remartga:
Il video davart l'exposiziun stat a disposiziun sut www.gr.ch. 
 

Infurmaziuns:
Jürg Simonett, directur dal museum retic, tel. 081 257 48 21


Gremi: museum retic
Funtauna: rg museum retic