Cun inoltrar la dumonda da construcziun a la citad da Cuira han ins ademplì in'ulteriura etappa da la realisaziun da l'edifizi nov per l'engrondiment dal museum d'art dal Grischun.
 
Ina donaziun generusa da 20 milliuns francs ha furmà l'onn 2011 la basa per l'engrondiment dal museum d'art dal Grischun a Cuira. Cun dar il consentiment per il project e cun approvar il credit restant dad 8,5 milliuns francs ha il cussegl grond il zercladur 2012 dà glisch verda per l'ulteriura planisaziun e realisaziun dal project impurtant per la cultura dal Grischun.
Il project victur da l'occurrenza ch'era vegnida organisada "DIE KUNST DER FUGE" dal ESTUDIO BAROZZI VEIGA S.L.P. Barcelona (architectura), Walter Dietsche, Baumanagement SA, Cuira (manaschament da construcziun) e Studio Paolo Bürgi, Camorino (architectura da cuntrada), è vegnì sviluppà vinavant en il fratemp en moda intensiva ed ha obtegnì madiranza da construcziun. Ils 22 d'avrigl 2013 è la dumonda da construcziun vegnida inoltrada a la citad da Cuira.
La permissiun da construcziun vegn spetgada la stad 2013, uschia che la primavaira 2014 poi vegnir cumenzà cun la construcziun sco tala. L'avertura da l'engrondiment è previsa per la stad 2016. Grazia a l'engrondiment po il museum d'art dal Grischun rinforzar sia posiziun sco chasa d'art impurtanta dal Grischun ed augmentar sia muntada naziunala.


Fotografias agiuntadas:
Vista interiura visualisada dal nov museum d'art dal Grischun a Cuira