En sia ultima sesida ha la regenza grischuna tractà diversas fatschentas communalas e regiunalas. 
 
Da vischnancas e da regiuns

• Arosa: Il project "Meglieraziun generala da Lüen, project parzial avertura dal guaud" da la vischnanca d'Arosa – represchentà tras la cumissiun da meglieraziun da Lüen – vegn approvà. Als custs cun dretg da subvenziun vegn garantida ina contribuziun chantunala da maximalmain 2 017 500 francs.
• Glion: La revisiun parziala da la planisaziun locala, concludida da la vischnanca da Glion ils 30 da mars 2012 che cumpiglia in plan da zonas ed il plan general da furmaziun 1:2000 "Revisiun parziala dal center da sanadad dal quartier da spital“, vegn approvada cun las suandantas resalvas e directivas: Per elavurar il plan d'areal stoi vegnir fatga ina procedura da concurrenza tenor las reglas da la societad svizra dals inschigners ed architects (SIA) ed en il plan d'areal stoi vegnir mussà, sche e co che las limitas da las immissiuns da canera vegnan resguardadas.
• San Vittore: La revisiun parziala da la planisaziun locala, concludida da la vischnanca da San Vittore ils 3 da december 2012, vegn approvada. Betg part integrala dal project da revisiun è la planisaziun d'utilisaziun speziala "Pol da svilup San Vittore" ch'è actualmain en elavuraziun e che ha l'intent da realisar ina zona da plazzas da lavur d'interess chantunal sin la plazza aviatica anteriura.

Contribuziuns chantunalas a differentas instituziuns

• Fundaziun Valendau Impuls: A la fundaziun Valendau Impuls vegn garantida – cun la resalva d'ina finanziaziun totala reglada – ina contribuziun chantunala da maximalmain 100 000 francs per la midada da l'Engihuss a Valendau. Sin basa da la lescha per promover il svilup economic en il chantun Grischun vegn ultra da quai garantì in credit chantunal da maximalmain 200 000 francs. Ils credits necessaris ston anc vegnir approvads dal cussegl grond. Il project per midar l'Engihuus a Valendau en l'ustaria al bigl cumpiglia in restaurant (ca. 30 plazzas), ina sala (75 plazzas) che po er vegnir duvrada sco sala communala, ina loggia (12 plazzas da seser) ed 8 chombras d'hotel (13 letgs) sco er in post d'infurmaziun da la Ruinaulta. Tut en tut èn previssas investiziuns da var 4 milliuns francs.

 
Projects da vias
La regenza ha approvà 1 161 000 francs per lavurs da construcziun sin il suandant traject:
- via dal Bernina: furniziun da la protecziun cunter crudada da crappa en connex cun il traject dal Lai da Puschlav 
 

Gremi: regenza
Funtauna: rg chanzlia chantunala dal Grischun