Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha concludì – sin fundament d'ina nova strategia da communicaziun – ina fasa d'emprova d'in onn per social media. A partir dad oz communitgeschan trais commembras e commembers da la regenza sco er set posts da servetsch ed il servetsch da medias da la chanzlia chantunala er sin Facebook e Twitter.

Social media n'èn betg mo ina schanza per las persunas privatas e per las interpresas da s'unir e da barattar ideas en ina rait electronica. Grazia a social media pon er las autoritads e las administraziuns rinforzar il dialog cun la populaziun. Sistems da rait sco Facebook e Twitter permettan da communitgar en ina moda simpla e directa cunzunt davart ils cuntegns ed ils servetschs quotidians dal maun public. "Follower" e "fans" vegnan infurmads exclusivamain sur quests chanals. Ma igl è er pussaivel da dumandar scleriments e da dar impuls en questa moda. Las autoritads e las administraziuns daventan meglier e pli svelt cuntanschiblas per las burgaisas e per ils burgais.

La regenza grischuna ha concludì l'onn passà ina nova strategia da communicaziun che prevesa d'introducir multimedia, d'integrar las mobile media, d'optimar la pagina d'internet www.gr.ch e da far in'emprova cun social media. L'emprima chaussa è gia ademplida; dapi il settember 2012 producescha la chanzlia chantunala dal Grischun sequenzas da film curtas ed actualas davart conclus da la regenza e davart fatschentas interessantas da l'administraziun. Ils films stattan a disposiziun en l'internet sut www.gr.ch, e las collavuraturas ed ils collavuraturs da las medias pon retrair material filmic en la qualitad da HD mintgamai sut ftp.staka.gr.ch (in pled-clav è necessari). Medemamain è vegnì meglierà l'access a la pagina d'internet dal chantun per ils apparats mobils. Cun lantschar ina fasa d'emprova per social media vegn ussa realisada la terza part da la strategia en la pratica. 

Las persunas che sa participeschan a l'emprova
A la fasa d'emprova d'in onn sa participeschan trais commembras e commembers da la regenza, set posts da servetsch sco er il servetsch da medias da la chanzlia chantunala. Da vart da la regenza èn quai il vicepresident Mario Cavigelli, schef dal departament da construcziun, traffic e selvicultura, Christian Rathgeb, schef dal departament da giustia, segirezza e sanadad, sco er Barbara Janom Steiner, scheffa dal departament da finanzas e vischnancas. Cavigelli, Rathgeb sco er Janom Steiner mainan accounts persunals da Facebook e da Twitter.

Da vart da l'administraziun piglian part a l'emprova la chanzlia chantunala (servetsch da medias) sco er la manadra ed ils manaders dals suandants set uffizis: uffizi per la scola populara ed il sport, uffizi da cultura, Plantahof, polizia chantunala (servetsch da medias), uffizi da vischnancas, uffizi da guaud e privels da la natira sco er uffizi da chatscha e pestga.

Facebook, Twitter e Youtube vegnan averts a medem temp per l'entira administraziun. Uschia survegnan las collavuraturas ed ils collavuraturs che n'èn betg participads activamain a l'emprova la pussaivladad da persequitar la fasa d'emprova. Ad occurrenzas d'infurmaziun per tut las collavuraturas ed ils collavuraturs èn gia sa participadas passa 400 persunas interessadas. Il pli tard suenter la fin da la fasa d'emprova decida la regenza davart la cuntinuaziun, davart l'extensiun u davart l'interrupziun da l'utilisaziun da social media.

Qua sutvart ina survista dals accounts da social media dal chantun:

Facebook
- Mario Cavigelli
- Christian Rathgeb
- Barbara Janom Steiner
- Kanton Graubünden 

Twitter
- Mario Cavigelli
- Christian Rathgeb
- Barbara Janom
- Mediendienst KtGR
- Dany Bazzell (uffizi per la scola populara ed il sport)
- Peter Küchler (Plantahof)
- Kantonspolizei GR
- Thomas Kollegger (uffizi da vischnancas)
- Reto Hefti (uffizi da guaud e privels da la natira)
- Georg Brosi (uffizi da chatscha e pestga)

Youtube
- Kanton Graubünden 

Infurmar en moda mobila, multimediala ed en ina rait sociala
Empruvar social media en in'applicaziun quotidiana è la mesira la pli nova dal chantun Grischun per obtegnair ina communicaziun mobila, multimediala ed en ina rait sociala. Facebook e Twitter permettan da communitgar svelt ed en moda orientada al dialog. Las contribuziuns da film sin gr.ch e sin Youtube infurmeschan en ina furma visuala attractiva. E grazia ad ina optimaziun da gr.ch per ils smartphones èsi pussaivel d'avair access da tut temp ed en moda simpla a la purschida plurilingua dal chantun en l'internet, er sch'ins è en viadi. 
 

Infurmaziuns:
dr. Claudio Riesen, chancelier, chanzlia chantunala dal Grischun, tel. 081 257 22 21


Gremi: regenza
Funtauna: rg chanzlia chantunala dal Grischun
Neuer Artikel