Sin invit dal chantun Grischun sa raduna la conferenza dals directurs da l'educaziun publica dals chantuns da la Svizra da l'ost e dal Principadi da Liechtenstein (CDEP-ost) oz venderdi, ils 24 da matg 2013, a sia radunanza annuala a St. Antönien en il Partenz.

La CDEP-ost è ina da las quatter conferenzas regiunalas da la conferenza svizra dals directurs chantunals da l'educaziun publica (CDEP). L'emprima sesida da la CDEP-ost è stada ils 23 da mars 1966. Oz fan ils suandants chantuns part da la conferenza: Turitg, Glaruna, Schaffusa, ils dus Appenzells, Son Gagl, Grischun, Turgovia e Sviz. Sviz è er anc commember da la conferenza dals directurs d'educaziun da la Svizra centrala. Ultra dals nov chantuns da la Svizra orientala è er il principadi da Liechtenstein commember da la CDEP-ost. Presidiada vegn la conferenza dapi l'onn 2010 dal cusseglier guvernativ Stefan Kölliker, schef dal departament da furmaziun dal chantun Son Gagl. La conferenza regiunala tracta en emprima lingia fatschentas da coordinaziun en il sectur da la scola e da l'educaziun da la Svizra orientala.
Il Grischun è quest onn il chantun ospitant da la radunanza annuala da la CDEP-ost ed envida la conferenza a sia sesida dad oz a St. Antönien en il Partenz. A la radunanza vegnan discutadas tranter auter las activitads e las prioritads da la politica da furmaziun en ils chantuns. Ulteriurs temas èn la situaziun da las linguas estras en la scola populara sco er il Plan d'instrucziun 21.
Il schef dal departament d'educaziun, cultura e protecziun da l'ambient s'allegra da dastgar beneventar quest onn las commembras ed ils commembers da la CDEP-ost en il Grischun. 


Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  


Gremi: departament d'educaziun, cultura e protecziun da l'ambient
Funtauna: rg departament d'educaziun, cultura e protecziun da l'ambient