Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna prenda posiziun davart la cuntraproposta indirecta tar l'iniziativa dal pievel "Per ina cassa da malsauns publica". Ultra da quai ha la regenza dà l'incumbensa per in studi da concept davart aria pli netta en la part sut da la Val Mesauc. 

Cassa unitara: La regenza refusa la cuntraproposta e l'iniziativa
La regenza grischuna refusa tant la cuntraproposta indirecta dal cussegl federal tar l'iniziativa dal pievel "Per ina cassa da malsauns publica" sco er l'iniziativa sco tala. Cun introducir ina reassicuranza per custs fitg gronds, cumbinada cun in perfecziunament da la gulivaziun da las ristgas vul la cuntraproposta reducir la motivaziun da las assicuranza da malsauns da selecziunar las ristgas. Da l'autra vart duain l'assicuranza fundamentala e l'assicuranza supplementara vegnir separadas e manadas en l'avegnir da duas differentas societads. Sco che la regenza grischuna scriva en sia consultaziun deliberass ina reassicuranza obligatorica per cas da malsogna che chaschunan custs fitg gronds las assicuranzas da malsauns da la motivaziun da metter en pe bunas purschidas da tractament per pazientas e pazients fitg chars. Plinavant na dettia nagin motiv per colliar il perfecziunament necessari da la gulivaziun da las ristgas cun l'iniziativa per ina cassa unitara. Ina separaziun da l'assicuranza fundamentala e da l'assicuranza supplementara en unitads giuridicas autonomas na s'orientass la finala betg a la clientella e chaschunass custs administrativs pli auts. L'iniziativa dal pievel sco tala refusa la regenza per ils suandants motivs: ina cassa unitara privass las persunas assicuradas da la libertad da tscherner e las assicuranzas da la motivaziun da spargnar. Ultra da quai rumpess ella cun ina lunga tradiziun en Svizra en il sectur da las assicuranzas da malsauns. 
 
L'impestaziun da l'aria en la part sut da la Val Mesauc duai vegnir reducida
Per meglierar l'igiena da l'aria en la part sut da la Val Mesauc vegn elavurà in studi da concept. La regenza ha surdà ina incumbensa correspundenta. Il studi duai mussar co che primarmain l'impestaziun da pulvra fina possia vegnir reducida efficaziamain en la part sut da la Val Mesauc. Las mesiras vertentas n'han displaschaivlamain gì nagin success. Latiers tutgan las controllas periodicas da stgaudaments pitschens da laina, l'obligaziun da filters cunter particlas en maschinas da construcziun e l'obligaziun da dumandar ina permissiun dal post chantunal spezialisà per arder ruments verds al liber. Tuttina vegnan la limita media annuala ed en spezial durant ils mais d'enviern la limita media per di da pulvra fina anc adina surpassadas cleramain en la part sut da la Val Mesauc (Lostallo fin San Vittore). Retschertgas han mussà che la pulvra fina deriva per gronda part da stgaudaments pitschens da laina che n'ardan betg optimalmain la laina. Per quest motiv duain vegnir tschertgads e proponids en il rom dal studi concepts alternativs ed innovativs per il provediment d'energia (per exempel la realisaziun d'ina rait per il provediment cun chalur a distanza, la promoziun da pumpas da chalur, l'utilisaziun da la geotermia e.u.v.). Uschia pudess vegnir creada a pli lunga vista ina plivalur per la Val Mesauc. I duai er vegnir examinà, sche projects energetics innovativs possian vegnir finanziads cun contribuziuns da la confederaziun e/u dal chantun. 

Furmaziun supplementara en talian ed en englais per il stgalim secundar I
La regenza ha surdà duas incumbensas per la furmaziun supplementara en metodica ed en didactica en talian ed en englais per persunas d'instrucziun dal stgalim secundar I. Il motiv è quel che per l'onn da scola 2014/15 midan las emprimas scolaras ed ils emprims scolars che han gia gì quatter onns talian respectivamain dus onns englais da la scola primara al stgalim superiur. Gia en la missiva tar la revisiun parziala da la lescha da scola l'onn 2008 èsi stà previs d'organisar in bloc da plirs dis da curs metodic-didactics per las persunas d'instrucziun dal stgalim superiur che instrueschan linguas estras (didactica da pliras linguas, introducziun en il nov med d'instrucziun). La furmaziun supplementara per tuttas duas linguas custa tut en tut 600 000 francs. 
 

Da vischnancas e da regiuns 
  • Castaneda e Sta. Maria i.C: A las duas vischnancas Castaneda e Sta. Maria i.C. vegn garantida ina contribuziun totala da maximalmain 170 820 francs per sanar e per optimar la serenera a Castaneda (impianto di depurazione delle acque, IDA). Il project da construcziun cumpiglia diversas mesiras per modernisar la serenera.
  • Bever: La nova constituziun communala da la vischnanca da Bever dals 29 d'avrigl 2013 vegn approvada.
  • Scuol: La revisiun parziala da la constituziun communala da la vischnanca da Scuol dals 17 da zercladur 2012 vegn approvada. Il motiv per la revisiun è la participaziun da la vischnanca da Scuol a la nova Energia Engiadina.
  • Alvagni: La revisiun da l'art. 7 da la lescha da taglia da la vischnanca dad Alvagni dals 22 da mars 2013 vegn approvada. Questa disposiziun pertutga il subject da taglia da la taglia sin la part d'ierta e sin donaziuns.
  • Alvaschagn: La revisiun dals art. 7, 14 e 22 da la lescha da taglia da la vischnanca dad Alvaschagn dals 22 da mars 2013 vegn approvada. Pertutgads da la revisiun èn il subject da taglia da la taglia sin la part d'ierta e sin donaziuns, la calculaziun da la taglia da chauns e las disposiziuns finalas.
  • Surava: La revisiun da l'art. 7 da la lescha da taglia da la vischnanca da Surava dals 22 da mars 2013 vegn approvada. Questa revisiun pertutga il subject da taglia da la taglia sin la part d'ierta e sin donaziuns.
  • Vuorz: La revisiun dals art. 7 e 22 da la lescha da taglia da la vischnanca da Vuorz dals 27 da mars 2013 vegn approvada. Questas disposiziuns pertutgan il subject da taglia da la taglia sin la part d'ierta e sin donaziuns sco er las disposiziuns finalas.

Contribuziuns chantunalas a differentas instituziuns 
  • CO SkyRace Internazionale: A la cursa da muntogna SkyRace Internazionale Valmalenco-Valposchiavo vegn concedida ina contribuziun dal fond da sport da 25 000 francs per l'onn 2013.

Projects da vias
La regenza ha approvà 820 000 francs per lavurs da construcziun sin il suandant traject:
- via da Buseno: lavurs d'impressari, Buseno nord – Boleder 
 

Gremi: regenza
Funtauna: rg chanzlia chantunala dal Grischun
Neuer Artikel