Ils chantuns Grischun ed Uri sa participeschan ensemen cun la confederaziun en il rom da la nova politica regiunala (program San Gottardo 2020) a la colliaziun dals territoris da skis da la Andermatt–Sedrun Sport SA cun tut en tut 48 milliuns francs. Per il Grischun stat en il center da las stentas da promoziun la creaziun d'in territori funcziunal en la part sura da la Surselva ch'è collià cun Andermatt.

En la nova arena da skis (Andermatt–Gemsstock–Oberalp Sedrun) duain tenor il plan da fatschenta dals investiders vegnir investids var 134 milliuns francs en in'emprima etappa. En il rom da la nova politica regiunala sa participescha la confederaziun cun 40 milliuns francs, il chantun Uri cun 5 milliuns francs ed il chantun Grischun cun 3 milliuns francs. Uschia sustegnan la confederaziun ed ils dus chantuns da staziunament fermamain il svilup dal territori da skis ed il svilup economic da la regiun.

En connex cun la nova arena da skis vegn ussa er concretisada l'idea da colliar ils territoris da skis da Sedrun e da Mustér che vegn discutada gia dapi in pèr onns. Quest project po er contribuir ina part impurtanta al svilup da l'infrastructura da skis ed uschia al svilup economic dal territori dal Gottard. Perquai èn ils chantuns Grischun ed Uri sco er la confederaziun pronts da garantir sut tschertas premissas er ina promoziun da las telefericas Mustér SA.

Cun colliar ils territoris da skis da Mustér fin ad Andermatt vegn realisà in territori per il sport d'enviern modern, attractiv e varià. Quel attira, er en vista a la purschida da pernottaziuns engrondida, dapli giasts dal di e giasts da vacanzas internaziunals. La finamira è ina purschida cumpletta internaziunalmain cumpetitiva, da la quala profitan – ultra dals giasts – er las persunas indigenas e las collavuraturas ed ils collavuraturs da tut la regiun e che stgaffescha ina valurisaziun enorma per la regiun. Vitiers vegn la pussaivladad da rinforzar il turissem da stad. Tut en tut sa porschan a las interpresas d'alloschament schanzas per investir, per stgaffir letgs chauds sco er per mantegnair e stgaffir plazzas da lavur. Da quai na vegnan betg mo a profitar l'economia e la populaziun en ils chantuns Uri e Grischun, mabain er en ils chantuns Tessin e Vallais. 
 

Infurmaziuns:
- president da la regenza Hansjörg Trachsel, schef dal departament d'economia publica e fatgs socials, tel. 081 257 23 01, e-mail: Hansjoerg.Trachsel@dvs.gr.ch  
- Eugen Arpagaus, manader da l'uffizi per economia e turissem, tel. 081 257 23 77, e-mail: Eugen.Arpagaus@awt.gr.ch  


Gremi: regenza
Funtauna: rg chanzlia chantunala dal Grischun