Il cusseglier guvernativ Christian Rathgeb fa fin l'atun ina visita a tut ils ospitals regiunals dal Grischun. Al lieu vul el discutar cun las persunas ch'èn responsablas per ils ospitals davart las dumondas e davart ils temas actuals. 

Ils ospitals regiunals èn pitgas impurtantas per il provediment da la sanadad. Els garanteschan che la populaziun da tut las parts dal chantun haja access a temp util – or dal puntg da vista da la medischina ed or dal puntg da vista social – ad in ospital cun ina incarica da provediment da basa.

Las visitas dal cusseglier guvernativ Christian Rathgeb servan a sclerir ils problems che occupan l'ospital respectiv ed a chattar eventualmain soluziuns. En quest connex duai er vegnir inditgada la vista ch'il departament da giustia, segirezza e sanadad ha per l'entir chantun. Il schef dal departament spetga ch'ils contacts cun las persunas ch'èn responsablas per ils ospitals regiunals dettian ultra da quai impuls per la futura politica d'ospitals dal chantun.

Sin sia tura tras ils ospitals vegn Rathgeb accumpagnà da ses collavuraturs ils pli stretgs, Claudio Candinas, secretari dal departament, e Rudolf Leuthold, manader da l'uffizi da sanadad. Sco emprims vegnan visitads gievgia, ils 6 da zercladur 2013, l'ospital da l'Engiadin'ota e l'ospital da la Bregaglia.

Survista da las visitas als ospitals 2013:

6 da zercladur	ospital da l'Engiadin'ota
6 da zercladur	ospital da la Bregaglia
26 da zercladur	ospital da Tusaun
23 d'avust	ospital dal Surses
5 da settember	ospital da Schiers
13 da settember	ospital da la Val Müstair
26 da settember	ospital da Puschlav
2 d'october	ospital da Scuol
3 d'october	ospital da Tavau
31 d'october	ospital da Glion

Infurmaziuns:
cusseglier guvernativ dr. Christian Rathgeb, schef dal departament da giustia, segirezza e sanadad, tel. 081 257 25 01, e-mail christian.rathgeb@djsg.gr.ch 
 

Gremi: departament da giustia, segirezza e sanadad
Funtauna: rg departament da giustia, segirezza e sanadad