Ina delegaziun dal cussegl grond dal chantun Glaruna ha visità oz durant la sessiun da zercladur las collegas ed ils collegas dal chantun Grischun a Cuira.
La delegaziun glarunaisa da set persunas è vegnida manada dal president dal parlament Fredo Landolt e dal vicepresident Kaspar Krieg. Els èn vegnids accumpagnads dals dumbravuschs Hans Peter Spälti, Fridolin Luchsinger e Mathias Zopfi, da l'anteriur president dal cussegl grond Richard Lendi e dal secretari dal cussegl grond Josef Schwitter.
Ils giasts dal chantun Glaruna èn vegnids beneventads da la presidenta dal cussegl grond dal Grischun Elita Florin-Caluori e dal vicepresident Hans Peter Michel. Da vart dal Grischun èn sa participads a la scuntrada plinavant ils presidents da las fracziuns e l'anteriur president dal cussegl grond Ueli Bleiker.
L'avantmezdi ha la delegaziun suandà las tractativas actualas en l'edifizi dal cussegl grond. Il suentermezdi ha ella visità il museum da la natira dal Grischun ed alura fatg in gir tras la staziun e la citad veglia da Cuira. La visita da la delegaziun ha servì al barat d'experientschas sco er a la tgira da las relaziuns amicablas.
Fotografia agiuntada:
Las delegaziuns da Glaruna e dal Grischun cun il president dal cussegl grond da Glaruna Fredo Landolt e la presidenta dal cussegl grond dal Grischun Elita Florin-Caluori (amez) sco er cun ils vicepresidents Kaspar Krieg (da vart sanestra dal president dal cussegl grond da Glaruna) e Hans Peter Michel (da vart dretga da la presidenta dal cussegl grond dal Grischun) davant l'entrada da l'edifizi dal parlament a Cuira.
Gremi: chanzlia chantunala dal Grischun
Funtauna: rg chanzlia chantunala dal Grischun