Navigation

Inhaltsbereich

  • Erste Mitteilung
  • Neuen Beitrag einfügen
In plan d'instrucziun general? Tut ils 21 chantuns germanofons e plurilings sa participeschan a quest project: Per tut ils stgalims da la scola populara – da la scolina fin a la fin dal temp da scola obligatoric – vegn sviluppà in plan d'instrucziun unitar. Quel ademplescha l'assimilaziun da las finamiras da furmaziun che vegnan pretendidas en ils novs artitgels da furmaziun ch'èn vegnids acceptads l'onn 2006 d'ina gronda maioritad da la populaziun svizra.

La cifra 21 stat per l'ina per ils 21 chantuns involvids e per l'autra per il 21. tschientaner. L'onn 2010 han las scheffas ed ils schefs da las direcziuns d'educaziun e da furmaziun deliberà ils parameters formals per in plan d'instrucziun interchantunal. Il cuntegn è vegnì concepì cun didacticras e cun didactichers da tut las scolas autas pedagogicas sco er cun persunas d'instrucziun en uffizi da tut ils stgalims da scola da tut ils chantuns cun consultar ulteriuras praticras e pratichers sco er persunas spezialisadas. In emprim sboz è vegnì preschentà l'onn 2012 ad instituziuns professiunalas dals chantuns participads. L'onn 2013 vegn ussa fatga ina consultaziun anc pli vasta cun la pussaivladad d'integrar reacziuns professiunalas en la repassada finala dal plan d'instrucziun. La regenza grischuna vegn a trametter a la conferenza svizra da las directuras e dals directurs chantunals da l'educaziun publica dals chantuns germanofons (CDEP-T) la fin da l'onn ina resposta en furma d'in questiunari emplenì. Il plan d'instrucziun 21 inclusiv infurmaziuns supplementaras po vegnir consultà en l'internet sut (www.lehrplan.ch). Per la consultaziun en il Grischun vegnan envida il departament d'educaziun, cultura e protecziun da l'ambient organisaziuns che stattan en contact cun la scola a prender posiziun en chaussa. 

Plans d'instrucziun da linguas per tut il chantun
Il chantun Grischun vul duvrar il plan d'instrucziun 21 per tut il chantun. Quai vul dir che otg plans d'instrucziun da linguas supplementars èn necessaris. Questas parts dal plan d'instrucziun èn vegnidas elavuradas en il project parzial per il Grischun cun persunas dal fatg dal chantun en stretga collavuraziun cun il project "plan d'instrucziun 21". Tut ils plans d'instrucziun da linguas dal plan d'instrucziun 21 èn vegnids sviluppads en moda coordinada sin basa da la didactica da la plurilinguitad.

En il center stattan las parts cuminaivlas. Per las scolas tudestgas vegnan ils plans d'instrucziun per la lingua da scola tudestg sco er per las linguas estras englais sco 2. e franzos sco 3. lingua estra facultativa (analogamain al talian sco 3. lingua estra en la Svizra tudestga) surpigliads senza midadas dal plan d'instrucziun 21 per ils plans d'instrucziun da linguas en il Grischun. Ils plans d'instrucziun per las scolas rumantschas e talianas sa basan sin il plan d'instrucziun cun tudestg sco lingua da scola, cuntegnan però differenzas concernent las cumpetenzas en litteratura e cultura ed en l'accentuaziun da la grammatica. Uschia vegnan integradas en ils plans d'instrucziun cumpetenzas che sa refereschan explicitamain a la cultura da la lingua correspundenta e ch'èn là ina chaussa natirala. Per las scolas rumantschas vegnan fixads en il udir ed en il leger ultra da quai pretensiuns minimalas tant per l'idiom sco er per rumantsch grischun. Per ellas vegn er formulà in agen plan d'instrucziun per tudestg sco segunda lingua. En quel vegnan fixadas pretensiuns minimalas pli autas che en ils plans d'instrucziun da linguas estras, perquai che las cumpetenzas en tudestg ston correspunder a quellas en rumantsch a la fin dal temp da scola obligatoric.

Las dumondas uffizialas da la CDEP-T che concernan il cuntegn dal plan d'instrucziun 21 èn accessiblas en l'internet sut www.avs.gr.ch. Il questiunari emplenì po vegnir tramess fin la fin d'october 2013 sin via electronica u per posta al departament d'educaziun, cultura e protecziun da l'ambient dal Grischun, consultaziun tar il plan d'instrucziun 21, secretariat dal departament, Quaderstrasse 17, 7000 Cuira (adressa dad e-mail: info@ekud.gr.ch). 
 

Infurmaziuns:
cusseglier guvernativ Martin Jäger, schef dal departament d'educaziun, cultura e protecziun da l'ambient, tel. 081 257 27 01, e-mail: Martin.Jaeger@ekud.gr.ch  


Gremi: regenza
Funtauna: rg chanzlia chantunala dal Grischun
Neuer Artikel