Navigation

Inhaltsbereich

  • Erste Mitteilung
  • Neuen Beitrag einfügen
La regenza grischuna ha concludì da sa participar a la cunvegna interchantunala davart las contribuziuns a las scolaziuns da las scolas spezialisadas superiuras. Ultra da quai è la regenza s'occupada da differentas fatschentas da vischnancas e da regiuns. 
 
Meglier access a purschidas da furmaziun extrachantunalas
Il chantun Grischun sa participescha a la cunvegna interchantunala davart las contribuziuns a scolaziuns da las scolas spezialisadas superiuras dals 22 da mars 2012. Questa nova cunvegna è ina cunvegna da finanziaziun e regla la gulivaziun da las grevezzas tranter ils chantuns en il sectur da las scolas spezialisadas superiuras. In chantun paja in import fixà per sias studentas e per ses students che frequentan ina scola spezialisada superiura (SSS) ordaifer il chantun al purtader da l'instituziun extrachantunala. A las studentas ed als students dals chantuns da cunvegna permetta quai in access equivalent a las purschidas da furmaziun extrachantunalas. Da questa nova cunvegna resultan per il chantun Grischun contribuziuns ad instituziuns extrachantunalas da totalmain var 3 277 000 francs. Ils retgavs che derivan da la nova cunvegna per las scolas en il chantun Grischun importan circa 3 223 000 francs. 


Da vischnancas e da regiuns
  • Churwalden: Per la revisiun totala da la planisaziun locala da la vischnanca da Churwalden ch'è vegnida concludida a chaschun da las radunanzas communalas dals 27 da settember e dals 2 d'october 2012 vegnan approvads la lescha da construcziun cun intginas excepziuns sco er ils plans da zonas cun intginas resalvas. Las vischnancas da Malix, Churwalden e Parpan han fusiunà il 1. da schaner 2010 a la vischnanca da Churwalden. La finamira da questa revisiun da la planisaziun locala è en emprima lingia da remplazzar ils differents meds da planisaziun da las trais vischnancas anteriuras tras ina planisaziun d'utilisaziun unitara per l'entira vischnanca nova.
  • Cazas: A la vischnanca da Cazas vegn garantida ina contribuziun chantunala da maximalmain 650 000 francs per renovar las vias champestras.
  • Rueun: La revisiun parziala da la planisaziun locala, concludida da la vischnanca da Rueun ils 3 d'october 2012, vegn approvada. Quest project da la planisaziun d'utilisaziun cuntegna l'adattaziun da la lescha da construcziun, dal plan da zonas sco er dal plan general d'avertura "Traffic" per realisar en la planisaziun locala in stabiliment per la gestiun da material sco er ina plazza da cumpostar en il territori da Grava da Schmuer. 

 

Contribuziuns chantunalas a differentas instituziuns ed interpresas 

  • Center da recicladi A&M SA: A la firma Center da recicladi A&M SA a Vaz sut vegn garantida ina contribuziun chantunala da maximalmain 162 080 francs per renovar ses binaris da colliaziun privats. La contribuziun vegn pajada mo, sche la realisaziun architectonica dal project è terminada fin la fin da l'onn 2015.
 
Projects da vias
La regenza ha approvà 1 206 000 francs per lavurs da construcziun sin il suandant traject:
- via d'Alvaschagn: renovaziun da la surstructura incl. allontanament da l'aua e conduct d'aua persa a la serenera da la vischnanca d'Alvaschagn 
 
 
Gremi: regenza
Funtauna: rg chanzlia chantunala dal Grischun
Neuer Artikel