Dals 15 fin ils 19 da fanadur 2013 fa il circus Lollypop in project cun circa 60 scolaras e scolars tar il center da transit Löwenberg a Schluein, e quai sut la devisa "Viver il circus". Ultra da famiglias da requirentas e da requirents d'asil che vivan en il chantun Grischun e che derivan da las pli differentas naziuns sa participeschan al circus er uffants indigens da la regiun. Il project vegn sustegnì en divers reguards da l'uffizi federal da migraziun, dal service civil internaziunal sco er da l'uffizi da migraziun e da dretg civil dal Grischun. Il project introducescha ils uffants oriunds da differents circuls culturals en il mund dal circus ed als permetta da concepir ensemen en il team e cun blera creativitad e fantasia lur atgna preschentaziun da circus.
Suenter ina introducziun intensiva en ils divers elements da circus serra il project cun ina preschentaziun publica venderdi, ils 19 da fanadur 2013, a las 18.00, en la tenda da circus tar il center da transit Löwenberg davant aspectaturas ed aspectaturs interessads. 


Remartga per las medias:
Las provas dals uffants han lieu mardi, mesemna e gievgia mintgamai da las 10.00 fin las 12.00 e da las 13.30 fin las 15.00 en la tenda da circus e dastgan gugent vegnir visitadas da la pressa. L'uffizi da fatgs da polizia e da dretg civil ed il circus Lollypop envidan cordialmain las collavuraturas ed ils collavuraturs da las medias a l'occurrenza finala. A partir da las 17.30 dat in represchentant da l'uffizi da migraziun e da dretg civil dal Grischun ulteriuras infurmaziuns per las represchentantas e per ils represchentants da las medias tar la tenda da circus. 
 

Infurmaziuns:
Georg Carl, manader da la partiziun "asil ed execuziun", uffizi da migraziun e da dretg civil, tel. 081 257 25 49, e-mail: Georg.Carl@afm.gr.ch  
 

Gremi: uffizi da migraziun e da dretg civil
Funtauna: rg uffizi da migraziun e da dretg civil