Zum Seiteninhalt

Communicaziun da la regenza dals 15 d'avust 2013

  • Erste Mitteilung
  • Neuen Beitrag einfügen
La regenza grischuna dat la permissiun per classas bilinguas a Domat. Plinavant prenda ella posiziun davart la revisiun parziala da las disposiziuns legalas concernent l'import da rauba en il traffic da viadi. 
 
Classas bilinguas a Domat
La regenza dat a la vischnanca da Domat la permissiun da manar a partir da l'onn da scola 2013/14 mintgamai ina partiziun da classa da la scola primara e da la scolina en moda bilingua en rumantsch e tudestg. Tenor la vischnanca da Domat èsi necessari da transfurmar il model da scola d'enfin ussa en ina partiziun da classa bilingua ed en partiziuns da classa monolinguas tudestgas. En il concept preschentà argumentescha la vischnanca quai cun il fatg che las duas lecziuns da rumantsch durant ils emprims dus onns da scola na bastian betg per in'acquisiziun solida da la lingua e ch'il rom d'elecziun obligatoric rumantsch vegnia darar tschernì a partir da la terza classa. Mo ina midada a l'instrucziun bilingua possia cumpensar quests dischavantatgs. 

Posiziun da la regenza davart l'import da rauba en il traffic da viadi
La regenza dal chantun Grischun beneventa da princip la revisiun parziala previsa da las disposiziuns legalas concernent l'import da rauba en il traffic da viadi. Areguard il fatg che la quantitad d'alcohol fermentà fin 18% vol., che po vegnir importada senza stuair pajar dazi, vegn augmentada da 2 a 20 liters, tira la regenza dentant en consideraziun ch'il privel d'imports nuncontrollads crescha en spezial en il territori damanaivel dal cunfin. Ustieras ed ustiers che vegnan per exempel accumpagnads da trais confamigliaras e confamigliars pudessan importar fin ad 80 liters vin a chaschun d'ina unica excursiun en Italia. Sche questa quantitad vegn – sco previs – propi mo utilisada per l'agen diever, n'è betg controllabel e po perquai er avair consequenzas negativas per il martgà da vin indigen. Tenor il princip che tuts duajan avair las medemas premissas, stoi en mintga cas vegnir garantì che per exempel la UE haja regulaziuns sumegliantas. 
 
 
Da vischnancas e da regiuns 
  • Valragn: Il project da la vischnanca da Valragn dal matg 2013 per las mesiras cunter auas grondas al Rain posteriur vegn approvà cun intginas cundiziuns. Tras sedimentaziuns durant ils ultims 10 onns è vegnida reducida la capacitad da deflussiun dal letg dal flum, uschia ch'il terren cunfinant è periclità da vegnir inundà en cas d'auas grondas.
  • La Punt Chamues-ch: La revisiun parziala da la planisaziun locala, che la vischnanca da La Punt Chamues-ch ha concludì a la radunanza communala dals 2 da matg 2013, vegn approvada. Quella cumpiglia il plan da zonas 1:500 "Bella Mira" sco er il plan da zonas e plan general da furmaziun 1:1000 "Alvra".
  • Malans: La revisiun parziala da la lescha da construcziun, che la vischnanca da Malans ha concludì a la radunanza communala dals 23 da matg 2013, vegn approvada. Las adattaziuns da la lescha da construcziun concernan d'ina vart la zona da mastergn, da l'autra vart la furmaziun dals tetgs.
  • St. Antönien: La planisaziun d'utilisaziun che la vischnanca da St. Antönien ha concludì a la radunanza communala dals 20 da zercladur 2012 per construir e per manar in'ovra electrica solara "Chüenihorn", vegn approvada cun intginas cundiziuns. La planisaziun cumpiglia ina revisiun da la lescha da construcziun, il plan da zonas 1:5000 sco er il plan general d'avertura 1:5000 "Implant solar Chüenihorn". 

Permissiuns e contribuziuns chantunalas a differentas instituziuns 
  • Uffizi per economia e lavur da Son Gagl: Per il project "Sardona-aktiv" vegn garantida a l'uffizi per economia e lavur da Son Gagl ina contribuziun chantunala da maximalmain 186 084 francs, sin il pli dentant in terz da las prestaziuns da contribuziun effectivas da tuts trais chantuns. Ils custs restants vegnan finanziads da la confederaziun, dals chantuns Son Gagl e Glaruna sco er dal purtader dal project. Il project "Sardona-aktiv" duai gidar ad augmentar la valur turistica da l'arena tectonica Sardona.
  • Fundaziun "Scola interchantunala da selviculturs": A la fundaziun "Scola interchantunala da selviculturs Maiavilla" vegn garantida ina contribuziun d'investiziun da maximalmain 2,1 milliuns francs als custs d'investiziun totals da 7 milliuns francs per sanar totalmain las immobiglias dal center da furmaziun per il guaud.
  • Club da tennis da Zizers: Al club da tennis da Zizers vegn garantida ina contribuziun da maximalmain 71 400 francs or dal fond da sport per sanar las plazzas da tennis e per renovar il local d'urdains.
  • Küblis-Saas turissem: Ils statuts da la corporaziun da vischnancas "Küblis-Saas turissem" vegnan approvads. Las vischnancas da Küblis e da Saas èn s'unidas ad ina corporaziun da vischnancas da dretg public sut il num "Küblis-Saas turissem" cun l'intent da promover e da sviluppar il turissem.

Projects da vias
La regenza ha approvà 10 266 000 francs per lavurs da construcziun sin ils suandants trajects:
- via naziunala Partenz: installaziuns electricas, sviament da Küblis
- via da Tschlin: reparaziun dal mir da sustegn, Plan Tulai – Puzzins
- via da Tarasp: lavurs d'impressari, correcziun da la via, 2. etappa, Florins – Chasté
- via sursilvana: lavurs da cuvrida en connex cun la correcziun da la via a Lumneins
- via d'Engiadina: lavurs d'impressari per segirar il stgav, Lavin – Giarsun
- via d'Engiadina: lavurs da cuvrida, punt a spunda e punt da Magnacun, Giarsun – Ardez vest 
 

Gremi: regenza
Funtauna: rg chanzlia chantunala dal Grischun
Neuer Artikel