En il rom da la 3. ediziun da l'emna da las bibliotecas grischunas envida la biblioteca chantunala dal Grischun a duas occurrenzas. Ina s'occupa da l'impurtanza dals cudeschs e dals pleds vegls en la litteratura rumantscha pli nova. En l'autra maina il cabarettist Flurin Caviezel il public tras in'aucziun cun cudeschs da la collecziun da dublettas da la biblioteca chantunala.

Mesemna, ils 11 da settember 2013, pledan Annetta Ganzoni (archiv svizzer da litteratura, Berna) e Clà Riatsch (universitad da Turitg) en lur referats en la biblioteca chantunala dal Grischun davart la glorificaziun dal "vegl", er en il senn da las "tradiziuns inventadas", en la litteratura rumantscha pli nova. A maun d'exempels da texts vegn eruida la valur dals cudeschs e dals pleds vegls e lur impurtanza sco simbols e fetischs. Il referat mussa ultra da quai emprovas da reutilisar in vocabulari arcaic per enritgir la lingua d'ina litteratura moderna. Questa occurrenza vegn organisada en cooperaziun cun la biblioteca populara dal Grischun. Ils referats vegnan tegnids en tudestg.
Gievgia, ils 12 da settember 2013, ha lieu en la biblioteca chantunala per l'emprima giada in'aucziun da cudeschs. La biblioteca chantunala dispona da la collecziun la pli gronda da litteratura davart il Grischun, d'auturas e d'auturs dal Grischun e da chasas edituras dal Grischun (uschenumnada Raetica). A quest ingiant vegnan vendids exemplars che la biblioteca chantunala posseda pliras giadas. Tranter quels sa chattan pitschens stgazis e truvaglias. Il cabarettist Flurin Caviezel divertescha e maina il public tras la purschida variada.
A tuttas duas occurrenzas èn las visitadras ed ils visitaders envidads ad in apero. 

Cudeschs vegls e pleds vegls en la litteratura rumantscha pli nova:
mesemna, ils 11 da settember 2013, a las 18.00
Aucziun da cudeschs cun Flurin Caviezel:
gievgia, ils 12 da settember 2013, gia a las 17.00,
mintgamai en la biblioteca chantunala, Karlihofplatz, Cuira. 
 

Fotografia agiuntada: