La regenza grischuna ha tractà diversas fatschentas communalas e regiunalas. 

Da vischnancas e da regiuns

• Lostallo: Las revisiuns parzialas da la planisaziun locala ch'èn vegnidas concludidas da la vischnanca da Lostallo vegnan approvadas cun resalvas. Tranter auter vegn la vischnanca incumbensada d'examinar – a chaschun da la proxima revisiun da la planisaziun locala – la classificaziun da las vias d'access als stabiliments gronds ch'existan sin ses territori. Actualmain ha l'access a differents stabiliments gronds ordaifer l'areal d'abitadi lieu sur vias forestalas ed agriculas.
• Sur (Valragn): Il plan da las zonas da protecziun ed il reglament per las zonas da protecziun per las funtaunas dal provediment d'aua da la vischnanca da Sur (Valragn) dals 22 da schaner 2013 vegnan approvads.
• Zizers: La revisiun parziala da la constituziun communala da la vischnanca da Zizers dals 9 da zercladur 2013 vegn approvada. Cun la revisiun parziala vegnan ademplidas tranter auter las pretensiuns che las persunas cun dretg da votar hajan dretgs da cundecisiun confurms a la constituziun.

Contribuziuns chantunalas a differentas instituziuns 

• Fundaziun Pro Marignano: Per realisar differents projects en connex cun il 500avel onn da memoria "Marignano 2015" vegn garantida a la Fundaziun Pro Marignano ina contribuziun da 15 000 francs dal fond da la lottaria naziunala.

Projects da vias
La regenza ha approvà 1 623 000 francs per lavurs da construcziun sin il suandant traject:
- via naziunala Partenz: montascha da las portas da fugia sco er dals implants da ventilaziun dal sviament da Küblis 
  

Gremi: regenza
Funtauna: rg chanzlia chantunala dal Grischun